Salamo 36 - Buki Tabu Lowaenei 1919

SALAMO 36.

¹ To to‘umalina ‘ina li‘oa loina ‘i gwae ‘ategu gamwanaia, Nigea ‘e bweu Eaubada matausina matanaia.

² Tauna matanaia ‘i ona dibidibi tauna ‘enaia, Be ‘enega ‘ina bubuna bokobokona gea‘abo si da lobaloba ta gea‘abo si da guiguitoase.

³ ‘Awana ‘ina ona si bokoboko ta si kabokabo: Mia sinasinapu ta guinua bobo‘ana ni‘atu ‘i pilisinedi.

⁴ Bubuna bokobokona ‘i wasewasegigie ‘ina ‘ebe‘eno ‘enaia; ‘Eda nigea bobo‘ana ‘ena tauna tuga ‘i tauiena; To‘umalina nigea ‘i guiguitoase.

⁵ Ieoba ie, ‘imu bubuna nua‘ole‘ole garewaia ‘i miami; ‘Imu bubuna ‘ai‘aila ‘i tu‘e ga garewaia.

⁶ ‘Imu bubuna paruparuna ‘i na‘ieana Eaubada ‘ina ‘oeao; ‘Imu loinao si ni‘u sinabwana: Ieoba ie, tai ta bomitawa u ‘ita‘i‘isidi.

⁷ Eaubada ie, ‘imu obobomanua‘ole‘ole ‘i bobo‘ai‘ailina! Ta tomota natudiao si denakwaia papemuao iauiaukwidi ‘agaraunaia.

⁸ Si da bobo‘ana wawasae ‘imu anua iapana ‘enega; Ta ‘u da enumedi ‘imu guausoara ‘adi boasi ununega.

⁹ Ma‘ieaio iawasina ‘arena ‘i miami ta ‘enega: ‘Imu ma‘edana ‘ena ma‘edana ‘a da ‘itena.

¹⁰ ‘Imu oboboma nua‘ole‘ole ‘u da ‘ebwa‘ebwaeae tuta iauiauna taudi si mwaratoniio ‘edia; Ta ‘imu bubuna paruparuna taudi si paruparu ‘atedia ‘edia.

¹¹ ‘Ae gagasa gea‘abo ‘i da mai ‘eguia, Ta to‐to‘umalina nimana gea‘abo ‘i da pa‘i iaulegu.

¹² Bubuna bokobokona ‘ana toguinuao ni‘atu si be‘u: Si ‘ula mwa‘utedi, ta gea‘abo si da ewaiwai be si da tootooro.