Salamo 34 - Buki Tabu Lowaenei 1919

SALAMO 34.

¹ Ieoba ia da ‘awabobo‘anena tuta iauiauna: ‘Ana tuputupu tuta ‘iauiauna ‘awagu ‘ena ‘i da miami.

² Iaruiaruagu ‘i da ona gagasa Ieoba manuna: Taudi ‘idi bubuna nuana si da nonona, ta si da guausoara.

³ Ieoba wa da ‘awaeseesei ma‘eguao, Be ‘ana esana ta da gitu‘eie rererea.

⁴ Ieoba ia ‘ebesena, ta ‘eguia ‘i ona limana, Ta ‘igu matauta iauiauna ‘ediega i ‘etoseegu.

⁵ ‘Ena si ‘ita, ta ma‘edana ‘i sae ‘edia: Ta maninidi gea‘abo si da omaiamaia.

⁶ Tai gomabeso gete ‘i bwau, ta Ieoba ‘i nonona, Ta ‘ina elo‘uia iauiauna ‘ediega i ‘etoseena.

⁷ Ieoba ‘ina anelose taudi si matautena ‘i mia sakowasiedi, Ta i ‘etoseedi.

⁸ Wa da too ta wa da ‘ita Ieoba ‘i boboana: Tai nina ‘ena i ‘emisa tauna ‘i bobo‘ana.

⁹ Ieoba wa da matautena, omi ‘ina to tapwaroro ‘ai‘ailao: Taudi si matautena gea‘abo si da botana ta ‘enega.

¹⁰ Laione menonoiadi si miamia daita, ta si botana: Ta taudi Ieoba si ‘ebesena gea‘abo ‘e bweu iage bobo‘ana ‘i da kakae ‘edia.

¹¹ Gogama, wa da mai be ‘eguia wa da nono: Ieoba ‘ana matauta ia da e‘itae ‘emia.

¹² To tai iawasina ‘i nuanuana, Ta asiata iauna ‘i nuanuana, be bobo‘ana ‘i da ‘itae?

¹³ Meiaio ‘u da egagare to‘umalinega, Ta sopaio ona kabokaboega.

¹⁴ To‘umalina wa da pilisinena, ta bobo‘ana wa da guinuei; Guguia wa da ‘ebese, ta wa da pili muri‘oaiabuna.

¹⁵ Ieoba matana to bubuna paruparu ‘edia ‘i dune, Ta tenana ‘i ebwarena ‘idi bwau ‘ena.

¹⁶ Ieoba maninina taudi si guinua to‘umali matadia ‘i tooro, Be ‘adi nua‘i‘ita ‘i da ‘upwa iaulena bare‘uiega.

¹⁷ To bubuna paruparu si bwau, ta Ieoba ‘i nonona, Ta ‘idi elo‘uia iauiauna ‘ediega i ‘etoseedi.

¹⁸ Ieoba taudi ‘atedi ‘episarina serabedia ‘i miami, Ta taudi iaruiaruadi ‘episarina i ‘etoseedi.

¹⁹ To bubuna paruparu ‘idi elo‘uia iauna: Ta Ieoba iauiaudi ‘ediega i ‘etoseedi.

²⁰ Lulunao iauiauna i ‘ita‘i‘isidi: Nigea ‘e bweu ‘ediega si lasalasa.

²¹ To‘umalina taudi si guinua to‘umali ‘i loemwawasidi: Ta taudi nuadi to‘umalina to bubuna paruparu ‘edia si da esilae.

²² Ieoba ‘ina to‐guinuao iaruiaruadi i ‘eli‘amina; Ta nigea ‘e bweu, taudi si ‘emisena ‘ediega ‘i da ‘esilae.