Salamo 33 - Buki Tabu Lowaenei 1919

SALAMO 33.

¹ ‘Omi ‘imi bubuna paruparuna, Ieoba ‘ena wa da guausoara: Tuputupu to tooro ‘ai‘aila ‘i lobwenena.

² Ieoba ‘ena wa da lokagutoki apiega: ‘Ena wa da wari tuputupu ‘ebegwane ma‘ana marakwa ‘e sanau ‘enega.

³ Wari auauna ‘ena wa da wariei; Wa da giapi ‘ai‘aila ‘enana sinabwanega.

⁴ Ieoba ‘ina ona ‘i paruparuna ta ‘enega; Ta ‘ina guinua iauiauna ‘i guinua ‘ai‘ailidi.

⁵ Bubuna paruparuna ta loina ‘i nuanuana: Bare‘u ‘i maa Ieoba ‘ina obobomega.

⁶ Ieoba ‘ina ona ‘enega garewaia i bubudi; Ta ‘idi boda iauiauna ‘awana iawasinega.

⁷ Ora ‘i egogonedi ‘atua sa‘uepoepopo: Ni‘u ‘i sa‘u egogonedi anuagwegwe ‘edia.

⁸ Bare‘u maibo‘ana Ieoba ‘i da matautena: To mia gabura iauiaudi si da tooro ‘amaiaba ‘enaia.

⁹ ‘I ona, ta ni‘atu ‘i apwesa ta ‘enega; ‘I ona, ta ‘i tooro pa‘ara.

¹⁰ Ieoba ‘ebeloina ‘idi nuena ‘i gibesobesona: Tomota ‘idi nuanua ‘i eiaseiaseiedi.

¹¹ Ieoba ‘ina nuena ‘i tooro pa‘ara ataia, ‘Atena ‘ina nuanua ga epata tomota iauiauna.

¹² Tauna ‘Ebeloina nina ‘ina Eaubada Ieoba tauna ‘i bobo‘ana; Tomota nidi i ‘esinuedi be si da ‘e ‘ana ‘egu‘eguiai.

¹³ Ieoba garewega i ‘itamwa‘utama; Tai natudiao iauiaudi i ‘itedi;

¹⁴ ‘Ina ‘ebemia ‘ana esena ‘enega i ‘ita apwesama to mia bare‘u iauiaudi ‘edia;

¹⁵ Tauna ‘atedi iauiaudi ‘i bubudi, Tauna ‘idi guinua iauiauna ‘i nuanua manudi.

¹⁶ Nigea ‘e bweu king boda ‘ina pwaru i da ‘etoseena: Tai pa‘arina waiwai sinabwana nigea i da ‘etoseena.

¹⁷ Ose ‘i iage besobeso ‘etoseana manuna: Ta gea‘abo ‘e bweu i eto‘etoseena ‘ina waiwai sinabwana ‘enega.

¹⁸ Wa ita, Ieoba matana taudi si matautena ‘edia ‘i miami, Taudi ‘ina nua‘ole‘ole si nuaiaina ‘edia;

¹⁹ Be iaruiaruadi i ‘etoseena mwawasega, Ta tuta botana ‘enega iawasidi ‘i sa‘una.

²⁰ Iaruiaruada Ieoba manuna ‘i iamwaiamwana: Tauna ‘ada ‘ebelema ta ‘ada lawa.

²¹ ‘Ateda ‘i da guausoara ‘enaia ta ‘enega, ‘Ana esana tabu ‘ena ni‘atu ta ‘emisa ta ‘enega.

²² Ieoba ie, ‘imu nua‘ole‘ole ‘i da miami ‘emaia, Na‘ieana ni‘atu ‘emuia ‘a nuaiaina.