Salamo 32 - Buki Tabu Lowaenei 1919

SALAMO 32.

¹ Tauna ‘ina li‘oa‐loina ni‘atu ‘i kweuna, tauna ‘ina loegesi ‘i so‘ona, tauna ‘i bobo‘ana.

² Tauna tai nina Ieoba nigea bubuna bokobokona ‘ena ‘i da sawena, Ta iaruiaruana nigea ‘e bweu kabo ‘ena ‘i miami, tauna ‘i bobo‘ana.

³ ‘Ena ia enono, lulugu si kadekaderi ‘Igu bwau dididiga manuna asiata maibo‘ana ‘enega.

⁴ Asiataia ta boiboia nimaio ‘i mwau ‘eguia ta ‘enega: ‘Igu pwasa i ‘ebunina ‘atua nawarae iaiiai ‘arana ‘enega. (Sela.)

⁵ ‘Igu loegesi ia simanena ‘emuia, ta ‘igu bubuna bokobokona nigea ia kwaiena: Ia ona, ‘Igu li‘oa‐loina ia da simanedi Ieoba ‘enaia; Ta ‘igu loegesi ‘ina bubuna bokobokona ‘u kweuna. (Sela.)

⁶ Gete manuna ‘e bweuna ‘e bweuna ‘i tapwaroro ‘emuia ‘i da sidasida tuta ‘enega si da lobaio: ‘Ai‘aila ‘ena boasi sinabwadi si maa‘apu‘apu gea‘abo ‘ena si da tu‘etu‘e.

⁷ ‘Oio ‘igu esena ‘ebemiakwaia; ‘ate‘uia‘uia ‘enega ‘u da egagaregu; ‘Etoseana ‘ana wari ‘ediega ‘u da giesakowasiegu. (Sela.)

⁸ Ia da giemwaratonio ta ia da e‘itaio ‘eda ‘enega ‘u da tauia: Ia da eonaio matagu ‘emuia ‘enega.

⁹ Gea‘abo wa da nadigega ose, nai mule, taudi nigea ma‘idi sinasinapumo: Taudi ‘adi iageao sara kainumu ta leda sabi giiaidi, Nai nigea serabemuia si da mai.

¹⁰ ‘Ebe‘elo‘uia iauna si da apwesa to to‘umalidi ‘edia: Ta tauna Ieoba ‘ena i ‘emisa, ‘atenua‘ole‘ole ‘i da miasakowasiena.

¹¹ Ieoba ‘ena wa da guausoara, ta wa da ‘uiawana, ‘Omi ‘imi bubuna paruparuna: Ta guausoara manuna wa da bwau, iauiaumi wa tooro ‘ai‘aila ‘atemia.