Salamo 31 - Buki Tabu Lowaenei 1919

SALAMO 31.

¹ ‘Emuia, Ieoba ie, ‘igu ‘emisa ia sa‘una; gea‘abo ‘u da tagwaregu be ia da omaiamaia ‘e bweu tuta: ‘U da ‘etoseegu ‘imu bubuna paruparuna ‘enaia.

² Tenaio ‘u da e‘etomwa‘utenama ‘eguia; ‘u da ‘etoseegu manini: ‘Eguia ‘u da egurewa pa‘arina, anua ‘ebelema be i ‘etoseegu.

³ ‘Oio ‘igu gurewa ta ‘igu anua saia; Ta ‘enega ‘amu esana manuna ‘u da ‘au‘ewegu ta ‘u da nuganegu.

⁴ Gomana ni‘atu si sa‘u kwaiena manugu ‘enega ‘u da lisigu; ‘Oio ‘agu ‘ebelema pa‘arina ta ‘enega.

⁵ Nimaio ‘enega iaruiaruagu ia ‘ebwaeae; Ieoba ie, ni‘atu ‘u li‘amigu, ‘oio ona ‘ai‘aila ‘ina Eaubada.

⁶ Taudi iage besobeso kabokabo si nuena ‘edia nuagu ‘i to‘umali: Ta Ieoba ‘ena ia ‘emisa.

⁷ Ia da guausoara ta ia da uiawana ‘imu nua‘ole‘ole ‘enaia: ‘Igu dedoi ni‘atu u ‘itena ta ‘enega; Iaruiaruagu ‘ina ‘ebededoi ‘u mwaratonidi:

⁸ Ta nigea ‘u lobodebodegu tarauwara nimanaia; ‘Aegu ni‘atu ‘u sa‘una esena sinabwana ‘enaia.

⁹ Ieoba ie, ‘u da ‘atenua‘ole‘oleegu, ‘abo‘agu ‘ebe‘elo‘uia ‘ena ia miami ta ‘enega: Matagu ‘i medarina dedoi ‘enega, tamo, iaruiaruagu ta bwaragu.

¹⁰ Iawasigu ‘i gumwara dedoi ‘enega, ta ‘enega, ta ‘agu iakwarao eiawasilagalaga ‘enega: ‘Igu waiwai ‘i mwa‘uta ‘igu bubuna bokobokona manuna, ta lulugu si ‘e logowa.

¹¹ ‘Agu tarauwara iauiauna manudi ia sinasinara. Tamo, goseguao ‘edia to sinabwasana, ta ‘ebe‘atesa‘ara taudi si mwaratonigu ‘edia: Taudi si ‘ita apwesagu ‘eguiega si dena.

¹² Si nuapupuregu ‘atua to kwaia nigea si da nuena: ‘Abo‘agu keiga episarina ‘atua.

¹³ Iauiaudi ‘adi ‘awato‘umali ni‘atu ia nonona ta ‘enega, Didiga esena iauna ‘edia: ‘Ena si nuanua rererea manugu, Si nuena ‘aene iawasigu si da ‘ewai.

¹⁴ Ta ‘emuia ia ‘emisa Ieoba ie; Ia gwae, ‘Oio ‘igu Eaubada.

¹⁵ ‘Igu tutao nimamuia si miami: ‘Agu tarauwarao nimadiega ‘u da ‘etoseegu, ta ‘ediega si unuunugu.

¹⁶ Maninio ‘u da tuiaiare ‘imu toguinua ‘enaia: ‘U da ‘etoseegu ‘imu oboboma nua‘ole‘ole ‘enaia.

¹⁷ Ieoba ie, gea‘abo ‘u da tagwaregu be ia da omaiamaia; ‘emuia ia bwau ta ‘enega: To to‘umalidi si da omaiamaia, si da mia enono Seola ‘enaia.

¹⁸ Sopa kabokabo si da ‘emeia lidolido; Taudi to bubuna paruparuna ‘edia si ona opa‘ara, Ma‘idi gagasa ta ma‘idi sinara.

¹⁹ ‘Imu bubuna bobo‘ana tosinabwa sana tauna ‘u sa‘una taudi si matautemu manudi, Tauna ‘u bubuna taudi ‘emuia si ‘emisa manudi, tomota natunao matadia!

²⁰ Mataio iauiaukwana ‘ena ‘u da kwaiedi tai ‘ina wasegigi ‘ediega: ‘U da ‘ita‘i‘ita kwaiedi anua‐‘ebe‘eiauiaukwa ‘enaia meia si losaia ‘enega.

²¹ Ieoba ta da ‘awabobo‘anena; ‘Ina oboboma nua‘ole‘ole to sinabwa sana ni‘atu ‘i e‘itagu ‘asa pa‘arina ‘ena ta ‘enega.

²² Ta manugu, ia ona ‘igu lomanini ‘ena, matamuiega si ‘upwa iaulegu: Ta ‘igu ‘awanoi ‘enadi ‘u nonona ‘ena ia bwau ‘emuia.

²³ ‘Omi ‘ina to‐‘esasenao, Ieoba wa da obobomena: To guinua ‘ai‘aila Ieoba i ‘ita‘i‘isina, Ta to guinua gagasa ‘i e‘isena sinabwana.

²⁴ Wa da pa‘arina, ta ‘atemi ‘i da ewaiwai. Iauiaumi Ieoba ‘ena wa nuaiaina.