Salamo 30 - Buki Tabu Lowaenei 1919

SALAMO 30.

¹ Ieoba ie, ia da tupuio; ‘u lisi tu‘eiegu ta ‘enega, Ta ‘agu tarauwarao nigea ‘u bubudi be si guausoara ‘etaniguia.

² Ieoba ie ‘igu Eaubada, ‘Emuia ia bwau, ta ni‘atu ‘u giebobo‘anegu.

³ Ieoba ie, iaruiaruagu ni‘atu u ‘au‘ewatu‘eiena Seolega: Ni‘atu u ‘ita‘i‘isigu maiawasigu, be ‘enega gea‘abo ia da mwa‘uta gaulaia.

⁴ Ieoba ‘ena wa da wari tuputupu, ‘Omi ‘ina to ‘esasenao, Ta ‘ana esana tabu ‘ena wa da lokagutoki.

⁵ ‘Ina gamwasoara tuta matana ‘e bweuna tugama; Iawasida ‘ina nuabobo‘ana ‘enaia: Dedoi ‘i da miami nai boiboi ‘enega, Ta guausoara ‘i da mai gonagonaia.

⁶ Ta ‘abo‘agu manugu, ‘igu mia esaesa ‘ena ia gwae, Gea‘abo sa‘i ia da loniu.

⁷ ‘Oio, Ieoba, ‘imu nuabobo‘ana ‘enega ‘igu ‘oea ni‘atu ‘u bubuna ga ‘i tooro pa‘ara: Maninio u ‘e‘etokwaiena; ia ‘atesa‘ara.

⁸ Ieoba ie, ‘emuia ia bwau; Ta Ieoba ‘ena ia lo ‘awanoi:

⁹ To‘ase ‘ina bobo‘ana raragu ‘ena, ‘ena ia mwa‘uta gaulaia? Kau ‘i da tupuio nai? ‘Imu ona ‘ai‘aila ‘i da simane nai?

¹⁰ Ieoba ie, ‘u da nono, ta ‘u da ‘atenua‘ole‘oleegu: Ieoba, ‘u da ‘igu to‐lema.

¹¹ Manugu ni‘atu ‘igu ‘ewabamu ‘u gibunina lausa ‘enaia; ‘Agu ‘oama ‘oausa ni‘atu ‘u alolona, ta ‘u elogadiwanigu guausoarega:

¹² ‘Arena ‘aene ‘igu esaesa, ‘i da wari tuputupu ‘emuia, ta gea‘abo ‘i da ‘ara‘araenono. Ieoba ie, ‘igu Eaubada, ‘emuia ia da lokagutoki ataia.