Salamo 3 - Buki Tabu Lowaenei 1919

SALAMO 3.

¹ Ieoba, ‘agu tarauwarao si sinabwa wawasae! Taudi si tooro mataguia iau‘ena‘idi.

² Iauiaudi si miami taudi si ona iawasigu manuna, Nigea manuna ‘e bweu lema Eaubada ‘ena. (Sela.)

³ Ta ‘oio, Ieoba ie, ‘u lawa sakowasiegu; ‘Igu esaesa, ta debagu ‘ana to‐gilagata.

⁴ Ieoba ‘ena ia bwau ‘enaguiega, Ta ‘ina ‘oea tabuiega ‘eguia ‘i ona limanama. (Sela.)

⁵ Ia ‘eno ‘eno ga ia ‘enomwataia; Ia tooro; Ieoba ‘i lemegu ta ‘enega.

⁶ Tomota ‘e teni tausanao gea‘abo ia matamatautedi, Taudi mataguia si tooro pa‘ara dadana.

⁷ Ieoba ie, ‘u da tooro; ‘u da ‘etoseegu, ‘igu Eaubada ie: ‘Agu tarauwarao iauiaudi ni‘atu ‘u unudi ‘ase‘asedi luluna ‘enaia; To to‘umalidi saradi ni‘atu ‘u bwagena.

⁸ ‘Etoseana Ieoba ‘ina iage: ‘Imu ona‐oboboma ‘imu tomota ‘edia ‘i da miami. (Sela.)