Salamo 28 - Buki Tabu Lowaenei 1919

SALAMO 28.

¹ ‘Emuia, Ieoba ie, ia da bwau; ‘Igu gurewa, gea‘abo ‘u da ‘etenatui ‘eguia: Nai, ‘abo ‘eguia nigea ‘u da onaonalimana, Ga ia da nadigega taudi si mwa‘uta gaulaia.

² ‘Igu ‘awanoi ‘enadi ‘u da nono, ‘ena ‘emuia ia bwaubwau. ‘Ena nimagu ia gilagasi ‘imu ‘ebeonaona tabu matanaia.

³ Gea‘abo ‘u da lisi separegu to to‘umalidi ma‘edi, Ta bubuna bokobokona ‘ina toguinuao ma‘edi; Taudi guguia si oneone gosediao ma‘ediao, Ta wasegigi ‘atedi ‘edia ‘i miami.

⁴ Na‘ieana ‘idi guinua ‘u da ‘ebwaedi, ta na‘ieana ‘idi bubuna ‘idi to‘umalina: Nimadi ‘idi guinuao na‘ieadi ‘u da ‘ebwaea‘edi; ‘Adi e‘isa ‘edia ‘u da ‘ebwaea.

⁵ Ieoba ‘ina guinua nigea si nuedi Nai nimana ‘idi guinua, Ta ‘enega ‘i da ‘auweara mwa‘utedi ta gea‘abo ‘i da ‘abi‘abi tu‘eiedi.

⁶ Ieoba ia da ‘awabobo‘anena, ‘Igu awanoi ‘enadi ni‘atu ‘i nonona ta ‘enega.

⁷ Ieoba tauna ‘igu waiwai ta ‘igu lawa; ‘Ategu ni‘atu ‘ena i ‘emisa, ta leme ia ‘ewena: Ta ‘enega ‘ategu ‘i guausoara sinabwana; Ta ‘igu wariega ia da tupuna.

⁸ Ieoba tauna ‘idi waiwai. Ta tauna i ‘etoseana giiaina pa‘arina ‘ina siwasiwarorodi ‘edia.

⁹ ‘Imu tomota ‘u da ‘etoseedi, ta ‘imu ‘ebe‘ewa ‘u da onaobobomedi: Wate ‘u da ‘e‘enidi, ta ‘u da ‘a‘aridi ‘ataia.