Salamo 27 - Buki Tabu Lowaenei 1919

SALAMO 27.

¹ Ieoba ‘igu ma‘edana ta ‘agu ‘etoseana; iaita ia da matautena? Ieoba iawasigu ‘ina waiwai; iaita manuna ia da ‘atesa‘ara?

² ‘Ena to‐guinua‐to‘umalina si mai ‘eguia sabi ‘e‘ai esiogu, Tugama ‘agu tarauwarao ta ‘agu to‐losaiao, si setupedi ta si be‘u.

³ ‘Abo boda si miabaula mataguia, Gea‘abo ‘ia da ‘ate‘atesa‘ara: ‘Abo saia ‘i tooro mataguia, Gote ‘enega ia da mia pa‘ara.

⁴ Iage ‘e bweuna Ieoba ‘ena ia sida, iage nina ia da ‘ebese: Be ‘enega Ieoba ‘ina anua ‘ena ia da miami iawasigu ‘ina asiata iauiauna, Sabi ‘ita Ieoba ‘ana ‘ita bobo‘ana, ta sabi eonaona ‘ina anua ‘enaia.

⁵ Asiata ‘ebeloniu ‘enega ‘i da ‘egagara kwaiegu ‘ina anua‐‘ebe‘eiauiaukwa ‘enaia ta ‘enega: ‘Ina anua‐tabenakele ‘ina esena kwaia ‘ena ‘i da kwaiegu; ‘I da gilagasigu gurewa debanaia.

⁶ Ta gete ‘enega debagu ‘i da mia tu‘e ‘agu tarauwarao si miasakowasiegu debadia; Ta ‘ina anua‐tabenakele ‘ena guausoara ‘ana taria ia da ‘ebwaeae; Ia da wari, tamo, tuputupu ia da wariei Ieoba ‘enaia.

⁷ Ieoba ie, ‘u da nono, ‘ena ia bwaubwau ‘enaguiega: Wate ‘u da ‘atenua‘ole‘oleiegu, ta ‘eguia ‘u da ona limana.

⁸ ‘Ena ‘u ona, ‘omi maninigu wa da ‘ebese; ‘ategu ‘i gwae ‘emuia, Ieoba, maniniio ia da ‘ebese. Maniniio gea‘abo ‘eguiega ‘u da kwaiena;

⁹ ‘Imu ‘ari‘ei gea‘abo ‘u da guiguitoase gamwasoarega: ‘Oio ni‘atu ‘agu to leme; Gea‘abo ‘u da ‘ulegu, nai ‘u da e‘idi‘idiegu, ‘Oio ‘agu ‘etoseana ‘ina Eaubada.

¹⁰ Tamagu ta sinagu ni‘atu si e‘idi‘idiegu ta enega, Ta Ieoba ‘i da ‘ewegu.

¹¹ Ieoba ie, ‘imu ‘eda ‘u da e‘itagu; Ta ‘eda nonokwaikwaina ‘ena ‘u da nuganegu, ‘Agu tarauwarao manudi.

¹² ‘Agu tarauwarao ‘idi nuena gea‘abo ‘ena ‘u da tagwatagwaregu; To simana kabokabo si tooro mataguia, ta taudi ‘ebe‘elo‘uia si mu‘eununa.

¹³ Ia mwawasa ni‘atu, ‘abo nigea ia iareiare be Ieoba ‘ina bubuna bobo‘ana ia da itena Maiawasidi ‘idi ‘asa ‘enaia.

¹⁴ Ieoba ‘ena ‘u da iamwaiamwa: ‘U da pa‘ara, be ‘ateio ‘i da nuanua waiwai; Tamo, Ieoba ‘ena ‘u da iamwaiamwana.