Salamo 26 - Buki Tabu Lowaenei 1919

SALAMO 26.

¹ Ieoba ie, ‘u da loina ‘eguia, ‘igu bubuna paruparuna ‘ena ia tautauia ta ‘enega: Wate Ieoba ‘ena ia ‘emisa ta nigea ia loniu.

² Ieoba ie, ‘u da ‘etaraegu, ta ‘u da toogu; ‘Igu nuakwaia ta ‘ategu ‘u da toodi.

³ ‘Imu oboboma‐nua‘ole‘ole mataguia ‘i miami ta ‘enega; Ta ‘imu ona‘ai‘aila ‘ena ia tautauia.

⁴ Tomota besobeso nigea ma‘edi ia miatoa; Ta gea‘abo to kabo ma‘edi ia da rugurugu.

⁵ To guinua to‘umalina ‘idi deriegogona ia guitoasena, To to‐to‘umalidi gea‘abo ma‘edi ia miamiatoa.

⁶ Nimagu ia da ‘utuna bubuna ‘esasena ‘enega; Nadigega ‘imu ‘ebetaria ia da sakowasiena, Ieoba ie:

⁷ Be ‘enega lokagutoki ‘enana ia da bubu be si da nono, Ta imu guinua ‘ebenuaowana iauiauna ia da simanedi.

⁸ Ieoba, ‘imu anua ‘ana ‘ebemia nuagu i ‘ewena, Ta esena nina ‘ena ‘imu esaesa ‘i miami.

⁹ Iaruiaruagu gea‘abo ‘u egogone to loegesi ma‘edi, Nai iawasigu rara ‘ina tai ma‘edi:

¹⁰ Nimadi ‘edia wasegigi ‘i miami, Ta ataidi ‘i maa tamapu‐kabokabo ‘ediega.

¹¹ Ta manugu, ‘igu bubuna ‘ai‘aila ‘ena ia da tautauia; ‘U da ‘etoli‘amigu, ta ‘eguia ‘u da ‘atenua‘ole‘ole.

¹² ‘Aegu ‘i tooro esena nonokwaikwaina ‘enaia: Deriegogonao ‘edia Ieoba ia da tupuna.