Salamo 25 - Buki Tabu Lowaenei 1919

SALAMO 25.

¹ Ieoba ie, ‘emuia iaruiaruagu ia gitu‘eie,

² ‘Igu Eaubada ie, ‘emuia ni‘atu ia ‘emisa, Gea‘abo ‘u da tagwaregu be ia da omaiamaia; Gea‘abo ‘u da tagwara be ‘agu tarauwarao si da ewaiwai ‘eguia.

³ Tamo, nigea ‘e bweu ‘emuia ‘i iamwaiamwana ‘i da omaiamaia; Taudi si wasegigi daita si da omaiamaia.

⁴ Ieoba ie, ‘imu bubuna ‘u da e‘itagu; ‘Imu ‘edao ‘eguia ‘u da e‘itae.

⁵ ‘Imu ona ‘ai‘aila ‘ena ‘u da ‘au‘ewegu, ta ‘u da e‘itagu; ‘Oio ‘agu ‘etoseana ‘ina Eaubada ta ‘enega; ‘Emuia ia iamwaiamwana asiata maibo‘ana ‘enaia.

⁶ Ieoba ie, ‘imu nua‘ole‘ole nuadi ta ‘imu obobomaiao ‘u da nua‘i‘sidi; Taudi lowaenei ‘ataia ta ‘enega.

⁷ ‘Igu tuta goama ‘ina loegesiao, nai ‘igu li‘oa loinaiao gea‘abo ‘u da nuanua‘i‘isi: Na‘ieana ‘imu obobomegu ‘u da nua‘i‘isigu, ‘Imu bubuna bobo‘ana manuna, Ieoba ie.

⁸ Ieoba ‘i bobo‘ana ta ‘i tooro paruparu: Ta ‘enega to loegesi ‘i da e‘itedi ‘eda ‘enaia.

⁹ To oonua ‘i da nuganedi loina ‘enaia: Ta to oonua ‘ina ‘eda ‘edia ‘i da e‘itae.

¹⁰ Ieoba ‘ina ‘eda iauiauna si oboboma ta ona ‘ai‘aila Taudi ‘ina ona‘upa‘upa ta ‘ina simana si ‘ita‘i‘isidi ‘edia.

¹¹ Ieoba ie, ‘amu esana manuna, ‘Igu bubuna bokobokona ‘u da li‘amina, ‘i sinabwana ta ‘enega.

¹² To tai Ieoba ‘i matautena? Tauna ‘i da e‘ita ‘eda i ‘esinuena ‘enaia.

¹³ Iaruiaruana ‘i da mia eiawai‘ata; Ta tubunao ‘asa si da ‘ewena ‘idi iage.

¹⁴ Ieoba ‘ina nuena ‘i miami taudi si matautena ‘edia; Ta ‘ina ona‘upa‘upa ‘i da e‘itedi.

¹⁵ Matagu tuta iauna Ieoba ‘ena si miami matanaia; ‘Aegu ‘i da lisidi gomanega ta ‘enega.

¹⁶ ‘Eguia ‘u da sana‘ilama, ta ‘u da ‘atenua‘ole‘oleiegu; ‘Abo‘agu ia mia waborebore ta ia elo‘uia ta ‘enega.

¹⁷ ‘Ategu ‘ina ‘ebededoiao si sinabwa: ‘Igu elo‘uia ‘ediega ‘u da ‘au‘ewegu.

¹⁸ ‘Igu dedo ta ‘igu elo‘uia ‘u da nua‘i‘isi; Ta ‘igu loegesi iauiaudi gea‘abo ‘u e‘isa.

¹⁹ ‘Agu tarauwarao ‘u da nuedi, si iauwawasae ta ‘enega; Ta taudi nua‐to‘umali ebe‘elouia ‘enega nuadi ‘i to‘umalina ‘eguia.

²⁰ Iaruiaruagu ‘u da ‘ita‘i‘isi, ta ‘u da ‘etoseegu: Gea‘abo ‘u da tagwara be ia da omaiamaia, ‘emuia ia ‘emisa ta ‘enega.

²¹ Bubuna ‘ai‘aila ta bubuna paruparuna si da egagaregu, ‘Emuia ia iamwaiamwana ta ‘enega.

²² Eaubada ie, Iseraela ‘u da ‘etoli‘amina ‘Ina ‘ebeloniu iauiauna ‘ediega.