Salamo 24 - Buki Tabu Lowaenei 1919

SALAMO 24.

¹ Bare‘u Ieoba ‘ina bare‘u, ta ‘ina maa; Gabura, ta taudi ‘ena si miami.

² Ora ‘edia ‘ana ‘autui ‘i sa‘una, Ta murua ‘edia ‘i giepa‘arina.

³ Iaita Ieoba ‘ina ‘oea ‘ena ‘i da tu‘e? Ta iaita ‘ina esena tabu ‘ena ‘i da tooro?

⁴ Tauna nimana nigea bailamo, ta ‘atena i ‘esasena; Tauna iaruiaruana nigea ‘i gilagasina gagasa ‘enaia, Ta nigea ‘i ona‘upa‘upa kabokabo.

⁵ ‘Ebeguausoara ‘i da ‘ewena Ieoba ‘enega, Ta bubuna paruparuna ‘ina ‘etoseana ‘ina Eaubada ‘enega.

⁶ Gete taudi si ‘ebesena ‘idi epata‐tomota, Taudi maniniio si ‘ebe‘ebesa; ‘Oio Iakobo ‘ina Eaubada. (Sela.)

⁷ ‘Omi ‘ari ‘ana ‘auboda, debami wa da gitu‘eie; Ta ‘omi anua ‘ana ‘auboda miaataia, wa da miatu‘e: Ta esaesa ‘ina King ‘i da ruguma.

⁸ Esaesa ‘ina King iaita nai? Ieoba pa‘arina ta waiwai, Ieoba waiwai losaia ‘enaia.

⁹ ‘Omi ‘ari ‘ina ‘auboda, debami wa da gitu‘eie; Tamo, wa da gitu‘eiedi, ‘omi anua ‘ana ‘auboda mia ataia; Ta esaesa ‘ina King ‘i da ruguma.

¹⁰ Esaesa ‘ina King nina iaita nai? Bodao ‘idi Ieoba, Tauna esaesa ‘ina King. (Sela.)