Salamo 22 - Buki Tabu Lowaenei 1919

SALAMO 22.

¹ ‘Igu Eaubada, ‘igu Eaubada, to‘ase manuna ‘u e‘idi‘idiegu? To‘ase manuna ‘agu lemaiega ta ‘igu ‘arabwau ‘ana ona ‘ediega ‘u mia edasora?

² ‘Igu Eaubada ie, asiata ‘enega ia bwau, ta nigea ‘u onaonalimana; Ta tuta boiboi, ta nigea ia enono:

³ Ta ‘oio u ‘esasena, ‘Oio Iseraela ‘ina totuputupuiao ‘edia ‘u miami.

⁴ Tamamao ‘emuia si ‘emisa: Si ‘emisa, ta u ‘etoseedi.

⁵ ‘Emuia si bwau, ta U ‘etoseedi; ‘Emuia si ‘emisa, ta nigea si omaiamaia.

⁶ Ta ‘abo‘agu didimwana, ta nigea tai; Tai ‘idi ‘ebeedagi, ta tomota si sinarigu.

⁷ Iauiaudi si ‘itegu ga si edagiegu ta si sinarigu: Sopadi si tu‘egadewewena, si lonepanepa, si gwae,

⁸ Ieoba ‘ena ‘u da tagwareio; ‘i da ‘etoseio: ‘I da ‘etoseena, ‘ena ‘i guausoara ta ‘enega.

⁹ Oio tauna gamwa ‘enega u ‘ewegu: ‘U gie‘emisegu ‘ena sinagu susuna ‘edia ia miami.

¹⁰ ‘Emuia si ‘ulegu gamwa ‘enega: ‘Oio ‘igu Eaubada sinagu gamwanega.

¹¹ Gea‘abo ‘u da mia ‘edasora ‘eguiega; elo‘uia serabenaia ta ‘enega; Nigea ‘e bweu ‘i da leme ta ‘enega.

¹² Bulomakau me‘olotodi iaudi si mia‘oabu‘oabuiegu: Basana ‘ina bulomakau me‘olotodi waiwaidi si miasakowasiegu.

¹³ ‘Awadi si ‘ebaridi ‘eguia, ‘Atua laioni ‘i sabulelewana ta ‘i bwaubwau didiga.

¹⁴ Boasi ‘atua ia daudau, Ta lulugu iauiaudi ‘idi tubwe si mia geiogeioi: ‘Ategu gweda nadigega; Diagu soranaia ‘i doga.

¹⁵ ‘Igu waiwai ‘i medarina ‘urena senasenamina ‘atua; Ta meiagu aseasegu ‘ena ‘i tuiaina; Ta ni‘atu u ‘au‘eweguma mwawasa ‘ina kau ‘enaia.

¹⁶ Kedewa si ‘oabu‘oabuiegu ta ‘enega: To guinua to‘umalina ‘idi egogona ‘i miasakowasiegu: Nimagu ta ‘aegu si ‘esasaa‘edi.

¹⁷ Lulugu iauiauna ia da sawa; Si ‘ita ta si dunedune ‘eguia:

¹⁸ ‘Agu ‘oama si ‘eguiai‘ena ‘edia, Ta ‘agu tara‘apwara ‘ena si ‘ula‐‘esinua.

¹⁹ Ta Ieoba Ie, gea‘abo ‘u da mia ‘edasora: ‘Oio ‘agu leme, ‘u da lomanini be ‘u da lemegu.

²⁰ Sisi‐saiega iaruiaruagu ‘u da ‘etoseena; ‘Igu iage tebweuna tuga kedewa ‘ina waiwaiega.

²¹ Laioni ‘awanega ‘u da ‘etoseegu; Tamo, bulomakau — bomitawa kunadi ‘eguia ‘u ona limana.

²² ‘Amu esana ia da simana tasiguao ‘edia: Deriegogona gamwanaia ia da tupuio.

²³ ‘Omi Ieoba wa matautena, wa da tupuna: Iauiaumi Iakobo tubunao wa da ‘awaeseesena; Ta wa da tooro matautena, ‘omi iauiaumi Iseraela tubunao:

²⁴ To dedoi ‘idi dedoi nigea ‘i sinarina nai ‘i guitoasena ta ‘enega; Nai maninina ‘enega i ‘etokwaiena; Ta ‘ena ‘i dedoi ‘enaia, ‘i nonona.

²⁵ ‘Emuiega ‘igu tuputupu ‘i mai deriegogona sinabwana ‘enaia: Taudi si matautena matadia ‘igu ona‘upa‘upa ia da sa‘u.

²⁶ Taudi ‘idi bubuna nuana si da ‘e‘ai ga sawesawedia: ‘Atemi ‘i da mia ataia.

²⁷ Bare‘u ‘ana ‘ebelosaroni iauiauna si da nua‘i‘isi ta Ieoba ‘ena si da sana‘ila: Ta ‘asa ‘idi boda iauiauna matamuia si da bwagobwago.

²⁸ ‘Ebeloina Ieoba ‘ina ‘ebeloina ta ‘enega: Ta tauna ‘i etoloina ‘asa debadia.

²⁹ Bare‘u iapadi iauiaudi si da ‘e‘ai ta si da bwagobwago: Iauiaudi kau ‘ena si mwa‘uta si da bwagobwago matanaia, Tugama tauna nigea kapekapeana iaruiaruana ‘i da ita‘i‘isina be ‘i bobo‘ana.

³⁰ Tubuna ‘ena si da guinua: ‘Inapwana manuna si da simana ga ‘epata‐tomata ‘enaia.

³¹ Si da mai ta ‘ina bubuna paruparuna si da simane Tomota si da tubua ‘enaia, ‘aene tauna ‘i guinuena.