Salamo 21 - Buki Tabu Lowaenei 1919

SALAMO 21.

¹ King ‘i da guausoara ‘imu waiwai ‘ena, Ieoba ie; Ta ‘imu ‘etoseana ‘ena ‘i da uiawana sinabwana!

² ‘Atena ‘ina nuanua ni‘atu u ‘ebwaena, Ta sopanao ‘idi ‘awanoi nigea ‘u egagara. (Sela.)

³ Bubuna bobo‘ana ‘ina ‘ebeguausoara ‘ediega ‘u nuganena: Peaula gola ‘esasena debanaia ‘u sa‘una.

⁴ Iawasina ‘emuiega ‘i sidena ga u ‘ebwaena; Tuga asiata dudurana ataia ta ataia.

⁵ ‘Ina ‘awaesaesa sinabwana ‘imu ‘etoseana ‘enaia: ‘Amaiaba ta ‘ebetuputupu ‘u sa‘una ‘enaia.

⁶ ‘U bubuna be i ‘ebeguausoara ataia ta ‘enega; Uiawanega ‘u gieguausoarina matamuia.

⁷ King Ieoba ‘ena i ‘emisa ta ‘enega, Ta To ‘Etana Sana ‘ina ‘atenua‘ole‘oleiega gea‘abo ‘i da loniu.

⁸ Nimaio ‘amu tarauwarao iauiaudi ‘i da lobadi: ‘Ataio taudi si guitoasemu ‘i da lobadi.

⁹ ‘U da bubudi na‘ieana umura ‘i sabesabelulu ‘imu gamwasoara ‘ana tuta ‘enega. Ieoba ‘i da tonedi ‘ina gamwasoara ‘enega, Ta awesabelulu ‘i da ‘enidi.

¹⁰ Uadi ‘u da giesaoori bare‘uiega, Ta tubudi tai natunao ‘ediega.

¹¹ To‘umalina si nuena matamuia; Wasegigi si nuena, tauna nigea si ewaiwai be si da guinua.

¹² ‘U da giesanaguiguidi ta ‘enega, ‘Amu tupu ‘ana nosanosa ‘u da losipwa ‘ai‘aili matadi.

¹³ Ieoba ie ‘u da miatu‘e, ‘imu waiwai ‘ena: Ta ‘enega ‘imu waiwai ‘a da warie ta ‘a da tupuie.