Salamo 20 - Buki Tabu Lowaenei 1919

SALAMO 20.

¹ Ieoba tuta elo‘uia ‘enega ‘emuia ‘i da ona limana; Iakobo ‘ina Eaubada ‘ana esana ‘i da gietooroio ‘etanaia;

² Leme ‘emuia ‘i da etunena anua tabuiega, Ta ‘i da giewaiwaieio Siona ‘enega;

³ ‘Imu ‘ebwaeadaita iauiauna ‘i da nua‘i‘isidi, Ta ‘imu taria ‘ara‘arasina ‘i da ‘ewena; (Sela.)

⁴ ‘Ateio ‘ina nuanua ‘i da ‘ebwa‘eio, Ta ‘imu nuena maibo‘ana ‘i da guinua saroni.

⁵ ‘Amu ‘etoseana ‘ena ‘a da ewaiwai, Ta ‘ima Eaubada ‘ana esana ‘ena ‘ima doe ‘a da gietooro; ‘Imu sidasida iauiauna Ieoba ‘i da guinua egumwari.

⁶ Gete ‘enega ia mwaratoni Ieoba tauna ‘i siwarorona i ‘etoseena; ‘Ina garewa tabu ‘enega ‘i da ona limana ‘enaia Ataina ‘ina waiwai ‘ebe‘etoseana ‘enega.

⁷ ‘Aidi saliote ‘ena si ‘emisa, ta‘aidi ose ‘edia; Ta ‘abo‘ama Ieoba ‘ima Eaubada ‘ana esana ‘a da ‘inana.

⁸ Si bwagobwago ta si be‘u; Ta ‘abo‘ama ‘a tooro, ta ‘a tooro paruparu.

⁹ Ieoba, ‘u da ‘etoseema; ‘Ena ‘a bwau King ‘i da ona limana ‘emaia.