Salamo 2 - Buki Tabu Lowaenei 1919

SALAMO 2.

¹ To‘ase manuna ‘ebeloina si etoitoila, Ta tomota iage besobeso si nuena?

² Bare‘u ‘ina king si gietoorodi, Ta to‐loina si eonaona rererea, Ieoba matanaia, ta ‘ina siwaroro ‘edia, si gwae,

³ ‘Idi iona ta da ‘e‘upa, Ta ‘idi barae ‘abo‘ada ‘edega ta da ‘e‘ula iaule.

⁴ Tauna garewaia ‘i miatoa ‘i da edagi: Ieoba ‘i da tuietuieiedi.

⁵ Ga ‘ina gamwasoara ‘enega ‘i da ona ‘edia, Ta ‘ina egamwagamwagu ‘enega ‘i da gie‐edeededonidi:

⁶ Ta ‘igu king ni‘atu ia sa‘una ‘Igu ‘oea tabu Siona ‘enaia.

⁷ Loina manuna ia da simana: Ieoba ‘eguia ‘i ona, ‘Oio natugu; Batua ia enatunemu.

⁸ ‘Eguiega ‘u da ona, ta ‘ebeloina ia da ‘ebwaemu ‘amu ‘egu‘eguiai manuna, Ta bare‘u ‘ina esena ‘ana ‘ebelosa‘u ‘imu iage manuna.

⁹ Keweliwelili kainumu ‘enega ‘u da lasedi; ‘U da ‘elowearidi ‘atua tobubu‐‘urena ‘ana gaeba.

¹⁰ Gete ‘enega wa da sinasinapu ta ‘enega, ‘omi kiniao: Wa da nono e‘ita, ‘omi bare‘u ‘ina to‐loinao.

¹¹ Ieoba ‘ena wa da guinua ma‘imi matauta, Ta wa da guausoara ma‘imi dedera.

¹² Natuna me‘olotona wa da ‘awamuina, ‘abona nai ‘i gamwasoara, ta ‘edega wa saoora, ‘Ina gamwasoara ‘i abe i ‘arata ta ‘enega. Taudi ‘ena si ‘emisa si bobo‘ana.