Salamo 19 - Buki Tabu Lowaenei 1919

SALAMO 19.

¹ Garewaia Eaubada ‘ina esaesa si simanena; Ta mwatui nimana ‘ina guinua ‘i e‘itaena.

² Asiata ga asiata ona i ‘ina‘inana, Ta boiboi ga boiboi mwaratoni ‘i e‘ita‘ena.

³ Nigea ‘e bweu ona nai ‘enana; ‘Enadi nigea si da nonona.

⁴ ‘Idi raba ‘i tauiawa bare‘u maibo‘ana ‘enaia, Ta ‘idi ona bare‘u ‘ana ‘ebelosaroni ‘enaia. ‘Edia tabenakele ni‘atu ‘i sa‘una sinara manuna,

⁵ Tauna na‘ieana to ai me‘olotona ‘ina anuega ‘i apwesama, Ta ‘i guausoara na‘ieana tai waiwai ‘ina ‘ebepili ‘i piliena.

⁶ ‘Ina tauiawa garewa ‘ina ‘ebelosa‘uiega, Ta ‘ina sakowasi ‘ana ‘ebelosaroni ‘edia: Nigea ‘e bweu iage ‘i kwaikwaia ‘ina iaiiaiega.

⁷ Ieoba ‘ina loina ‘i bobo‘ai‘ailina, iaruiarua ‘i giebobo‘anena: Ieoba ‘ina simana ‘i pa‘ara ‘ai‘aila, to emwagemwage ‘adi sinapu ‘i sa‘una.

⁸ Ieoba ‘ina loina si paruparu, ‘ate si gieguausoarina: Ieoba ina ona i ‘esasena, mata ‘i giema‘edanedi.

⁹ Ieoba ‘ana matauta i ‘esasena, ‘i miaataia; Ieoba ‘ina etara si eiage ‘ai‘aila, ta paruparuna maibo‘ana.

¹⁰ Si bobo‘ana wawasae gola ‘enaia, tamo, gola ‘esasena sinabwana ‘enaia; Dibidibi wawasae wate oni ‘enaia, ta oni wagana ‘enaia.

¹¹ Wate ‘ediega ‘imu ‘ari‘ei si ‘emataruena; ‘Adi ‘ita‘i‘ita e‘isa sinabwana ‘ena ‘i miami.

¹² Iaita ‘ina loegesi ‘i da ‘itedi? Loegesi kwaia ‘ediega ‘u da li‘amigu.

¹³ Loegesi oopa‘ara wate ‘imu ‘ari‘ei ‘ediega ‘u da giiaina; Gea‘abo ‘eguia si da loiloina; ga ia da bobo‘ai‘ailina, Ta li‘oaloina sinabwana ‘enega ia da eli‘amigu.

¹⁴ ‘Awagu ‘ina ona ta ‘ategu ‘ina nuanua si da bobo‘ana matamuia, Ieoba ie, ‘igu gurewa, ta ‘agu to ‘ewalima.