Salamo 18 - Buki Tabu Lowaenei 1919

SALAMO 18.

¹ Ieoba ie, ia obobomemu, ‘igu pa‘arina ‘oio.

² Ieoba ‘igu gurewa, ta ‘igu anua‐waiwai, ta ‘igu to‘etoseana; ‘Igu Eaubada, ‘igu gurewa waiwai, ‘ena ia da ‘emisa; ‘Igu lawa, ta ‘igu ‘etoseana kunana, ‘igu anua‐‘ebe‘ita‘i‘ita ‘etosorana.

³ Ieoba ‘ena ia da bwau, tauna tuputupu ‘i sawesawenaia: Nadigega ia da bobo‘ana ‘agu tarauwarao ‘ediega.

⁴ Mwawasa ‘ina barae si miasakowasiegu, Ta bubuna to‘umalina ‘ina murua si gie‘atesa‘arigu.

⁵ Seola ‘ina barae si sakowasiegu: Mwawasa ‘ina sikwao si mai ‘eguia.

⁶ ‘Igu ‘ate‘uia‘uia ‘enega ia bwau Ieoba ‘enaia, Ta ‘igu Eaubada ‘ena ia bwau: ‘Ina anua‐tabuiega ‘enagu ‘i nonona, Ta ‘igu bwau matanaia tenana ‘ena ‘i rugu.

⁷ Ga bare‘u ‘i loniu ta ‘i dedera, ‘Oea wate ‘adi ‘autui si loniu Ta si dedera, ‘i gamwasoara ta ‘enega.

⁸ Ubusu gaulina ‘ediega ‘asu ‘i bwawabwawa, Ta awe sabelulu ‘awanega i ‘enidi: Kebwanigita si ‘ara‘arasina ‘enega.

⁹ Garewa ‘arenao wate ‘i giekopudi, ta ‘i mwa‘utama; Ta guguioi ‘ubwaubu ‘aena ‘agaraunaia ‘i miami.

¹⁰ Ta ieruba ‘ena ‘i geru, ta ‘i taea: Tamo, ‘i taea manini iagila papena ‘edia.

¹¹ Guguioi ‘i bubuna be ‘ina esena kwaia, ‘ina anua ‘i miasakowasiena; Boasi ‘idi guguioi, mwatui poanana badodi.

¹² Tuiaiarina matanaia ‘enega ‘ina poana badodi si deritaona, ‘Usana‐gurewa ta ‘awe kebwanigisina.

¹³ Ieoba wate ‘i weparara garewaia, Ta To Etana Sana ‘enanega ‘i bwau; ‘Usana‐gurewa ta awe kebwanigisina.

¹⁴ ‘Ina tupu ‘ina gita ‘i etunediwa, ta ‘i giesawaridi; Tamo, namara iauwawasae, ta ‘i gie‘atesa‘aridi.

¹⁵ Ga boasi ‘awadi si apwesama, Ta bare‘u ‘ina ‘autu nigea ‘idi lobodabodamo, ‘Imu ba‘e ‘ena, Ieoba ie, Ubusu gaugauliio iawasidi ‘ina mu‘enunu didiga ‘enaia.

¹⁶ ‘Etanega ‘i etune, i ‘au‘ewegu; Boasi iauna ‘ediega ‘i lisi‘ilegu.

¹⁷ I ‘etoseegu ‘agu tarauwara waiwai ‘enega, Ta taudi nuadi ‘i to‘umali ‘eguia ‘ediega, si ewaiwaiwawasae ‘enega.

¹⁸ ‘Eguia si mai ‘igu miato‘umalina ‘ana asiata ‘enega: Ta Ieoba ‘igu ‘ebe‘emisa.

¹⁹ Wate ‘i me‘egu esena sinabwana ‘enaia; I ‘etoseegu, ‘i guausoara ‘eguia ta ‘enega.

²⁰ Ieoba ‘i e‘isegu ‘igu bubuna paruparuna na‘ieana; Na‘ieana nimagu ‘idi ‘esasena ‘eguia ‘i e‘isa.

²¹ Ieoba ‘ina ‘eda ia ‘ita‘i‘isidi ta ‘enega, Ta nigea ‘igu Eaubada ‘enega ia pilisinena to‘umalina.

²² ‘Ina loina iauiauna mataguia si miami ta ‘enega, Ta ‘ina loina tomwanao nigea ‘eguiega ia ‘ewa‘ewa iaule.

²³ Wate ia bobo‘ana ‘ai‘aila ‘enaia, Ta ‘igu bokobokona ‘enega ia ‘ita‘i‘isigu.

²⁴ Ta ‘enega Ieoba ‘i e‘isegu na‘ieana ‘igu bubuna paruparuna, Na‘ieana nimagu ‘idi ‘esasena matanaia.

²⁵ To ‘atenua‘ole‘ole ‘edia ‘u da e‘itaeio ‘atenua‘ole‘ole; Tai bobo‘ai‘ailina ‘enaia ‘u da e‘itaeio bobo‘ai‘ailina;

²⁶ To ‘esasena ‘edia ‘u da e‘itaeio ‘esasena; Ta to bokobokona ‘edia ‘u da e‘itaeio bokobokona.

²⁷ Tomota elo‘uia ‘u da ‘etoseedi ta ‘enega; Ta mata gagasa ‘u da gimwa‘utedi.

²⁸ ‘Igu maieare ‘u da loe‘abi: Ieoba ‘igu Eaubada ‘igu guguioi ‘i da giema‘edanena.

²⁹ ‘Oio ‘enega boda ia pili bwaredi; Ta ‘igu Eaubada ‘enega ‘ari‐gurewa ia diditaona.

³⁰ Ta Eaubada manuna, ‘ina ‘eda bobo‘ai‘ailina: Ieoba ‘ina ona si toona ga ‘i bobo‘ana; Tauna iauiaudi ‘ena si ‘emisa ‘i lawedi ‘edia.

³¹ Iaita Eaubada ta ‘enega, Ieoba tugama? Ta iaita gurewa, ‘ida Eaubada tebweunamo?

³² Eaubada nina waiwaiega ‘i elogadiwanigu, Ta ‘igu ‘eda ‘i giebobo‘ai‘ailina.

³³ ‘Aegu ‘i bubudi be si da ‘egota mewainena ‘aedi nadigega: Ta ‘igu esena ‘ebemiatu‘e ‘edia ‘i sa‘ugu.

³⁴ Nimagu ‘i e‘itedi be si losaia; Ta ‘enega nimagu tupu barasa si gielisiena.

³⁵ Wate ‘agu ‘etoseana ‘ana lawa ni‘atu u ‘ebwaegu: Ta ‘ataio ni‘atu ‘i gietoorogu, Ta ‘imu bubuna nuana ni‘atu ‘i giesinabwegu.

³⁶ ‘Igu tautauia ‘aegu ‘ubunaia ni‘atu ‘u giesinabwena, Ta ‘aekukugu nigea si loniu.

³⁷ ‘Agu tarauwarao ia da pilimuridiega, ta ia da ‘ewadi: Ta gea‘abo ia da sanasana‘ilama ta si da gumware bemi.

³⁸ Ia da ‘elo‘etobwaredi be ‘enega gea‘abo si da ewaiwai be si da tootooro: ‘Aegu ‘agaraunaia si da be‘u.

³⁹ Ni‘atu waiwaiega ‘u elogadiwanigu losaia ‘enaia ta ‘enega: Taudi mataguia si tooro ni‘atu ‘u giekopudi ‘agarauguia?

⁴⁰ Wate ‘agu tarauwarao ‘u giesanaguiguidi ‘eguia, Be ‘enega taudi si guitoasegu ia da ‘upwa‐iauledi.

⁴¹ Si bwau, ta nigea ‘e bweu ‘i miami be ‘i da ‘etoseedi; Ieoba ‘ena tugai, ta nigea ‘edia ‘i onaonalimana.

⁴² Ga ia mutudi matagidarautuana ‘atua kau iagila matanaia; Ia siwa iauledi ‘atua ‘eda sepwaridi.

⁴³ Tomota ‘idi e‘upwa ni‘atu ‘ediega u ‘etoseegu; ‘U bubugu be ia e‘ebeloina debadi: Tomota nigea ia mwaramwaratonidi ‘eguia si da guinua.

⁴⁴ ‘Ena ‘aregu si nonona si da ematamatana manini ‘eguia: Tou‘umara ‘eguia si da ematamatana.

⁴⁵ Tou‘umara si da sawara, Ta ‘idi esena kwaia ‘ediega si da mai ma‘idi dededera.

⁴⁶ Ieoba maiawasina; ta ‘igu gurewa si da tupuna; Ta ‘agu ‘etoseana ‘ina Eaubada ‘i da mia tu‘e:

⁴⁷ Tuga Eaubada nina ‘e‘isa ‘i bubuna manugu, Ta tomota ‘i gimwa‘utedi ‘agarauguia.

⁴⁸ ‘Agu tarauwarao ‘ediega i ‘etoseegu; Tamo, taudi si tooro mataguia ‘u gitu‘eiegu ‘etanidia: Tai to didiga ‘enega u ‘etoseegu.

⁴⁹ Ta ‘enega ‘emuia ia da lokagutoki, Ieoba ie, ‘ebeloina gamwagamwanidia, Ta ‘amu esana ‘ana tuputupu ia da wariei.

⁵⁰ ‘Etoseana sinabwana i ‘ebwaea ‘ina king ‘enaia; Ta oboboma nua‘ole‘olena ‘i e‘ita ‘ina to oroaiao ‘edia, Dabida ta tubunao edia, ga tuta ataia.