Salamo 17 - Buki Tabu Lowaenei 1919

SALAMO 17.

¹ Ieoba ie, iage paruparuna ‘u da nonona, ‘igu dedoi ‘ena ‘u da nono: ‘Igu sidasida, tauna nigea sopa kabokabo ‘ediega ‘i tauiawa, ‘u da nonona.

² ‘Agu loina ‘i da apwesama matamuiega; Mataio bubuna ‘ai‘aila ‘ena ‘i da ‘ita.

³ ‘Ategu ni‘atu ‘u toona; boiboia ‘ena ‘u mia ‘eguia; Ni‘atu ‘u toogu, ta nigea ‘e bweu iage ‘u lobaloba; ‘Abo‘agu nuagu ‘i pa‘ara be gea‘abo ‘awagu loina ‘i da li‘oali‘oa.

⁴ Ta tai ‘idi guinua manudi, sopaio ‘idi ona ‘enega Ia ‘ita‘i‘isigu to bubuna didiga ‘idi ‘eda ‘ediega.

⁵ ‘Igu tautauia ‘imu ‘eda ‘edia si miaiaina, ‘Aegu nigea si da mamaiadila.

⁶ ‘Emuia ia bwau ni‘atu, ‘oio ‘eguia ‘u da ona limana ta ‘enega, Eaubada ie: Tenaio ‘eguia ‘u da enonotenasienama, ‘enagu ‘u da nonona.

⁷ ‘Imu oboboma to sinabwa sana ‘u da e‘ita, ‘Oio taudi si ‘emisemu u ‘etoseedi ataimuiega Taudi si tooro matadia ‘ediega.

⁸ ‘U da ‘ita‘i‘isigu mata‐poupou ‘atua, Papemuao iauiaukwidi ‘agarauninaia ‘u da kwaiegu,

⁹ To to‘umalidi si ‘oaegu ‘ediega, ‘Agu tarauwarao to unua, taudi si ‘oabu‘oabuiegu.

¹⁰ Iapadi ‘ena si miabodena: ‘Awadiega si ona gagasa.

¹¹ ‘Ima tautauia ‘enega si ‘oabu‘oabuiema: Matadiega si dunedune mataililiema be si ‘ulamw‘autema bare‘uia.

¹² Tauna ‘atua laione ‘ana ‘e‘ai manuna ‘i iatoiatoai, Ta ‘atua laione menonoiana esena kwaia ‘edia i ‘enokwaia.

¹³ Ieoba ie, ‘U da tooro, Matanaia ‘u da tooro, ‘u da ‘ulamwa‘utena; Iaruiaruagu ‘u da ‘etoseena to to‘umalidi ‘ediega ‘imu sisi‐saiega;

¹⁴ Tai ‘ediega, nimamuiega, Ieoba ie, Gabura ‘ina tai ‘ediega, taudi ‘adi ‘egu‘eguiai tuta gete ‘ena, Ta gamwadi ‘u loemae ‘imu gwegweiega: Nuadi ‘i bobo‘ana gogama manudi, Ta ‘idi gwegwe tupwana si pilisinena meameadi ‘edia.

¹⁵ Ta manugu, Mataio ia da ‘itena bubuna paruparuna ‘enaia: Nuagu ‘i da bobo‘ana, ‘ena ia da tooro, ‘amu ma‘ama‘aiauiega.