Salamo 16 - Buki Tabu Lowaenei 1919

SALAMO 16.

¹ Eaubada ie, ‘u da ‘ita‘i‘isigu: ‘emuia ia ‘emisa ta ‘enega.

² Ni ‘atu ia ona Ieoba ‘ena, ‘Oio ‘igu ‘Inapwana: Nigea ‘e bweu wate ‘igu bobo‘ana tebweuio.

³ Ta Taudi to iaruiarua‐‘esasena bare‘uia si miami manudi, Taudi bobo‘ai‘ailidi ‘edia ‘igu uiawana maibo‘ana ‘i miami.

⁴ Taudi Ieoba si sa‘ugelasa mari eaubada manuna ‘idi elo‘uia si da eiau. ‘Idi ‘ebwaeadaita numanuma rara ‘enega gea‘abo ia ‘ebwa‘ebwaea, Nai ‘adi esana ia da ‘ewedi sopagu ‘edia.

⁵ Ieoba tauna ‘agu ‘egu‘eguiai ta ‘agu keiga tomwadi; ‘Igu miamia ‘u giiaina.

⁶ Raba si mwa‘utama ‘eguia esena miabobo‘ana ‘edia; Tamo, ‘igu ‘ewa‘ewa ‘i bobo‘ana.

⁷ Ieoba ia da tupuna, tauna ‘i e‘itegu; Tamo, ‘ategu ‘i e‘itegu tuta boiboi ‘edia.

⁸ Ieoba ia sa‘u mataguia ataia: Ataiguia ‘i miami, ta ‘enega gea‘abo ia da loniu.

⁹ Ta ‘enega ‘ategu ‘i da guausoara, ta ‘igu esaesa ‘i uiawana: Esiogu wate ‘i da mia ‘atepatu.

¹⁰ Iaruiaruagu nigea ‘u da pilisinena Seola ‘ena ta ‘enega; Nai ‘imu to ‘esasena ‘u da tagware be bila ‘i da ‘itena.

¹¹ Iawasi‐‘arena ‘ina ‘eda ‘u da e‘itagu: Matamuia guausoara maibo‘ana ‘i miami; ‘Ataimuia ‘ebeguausoara ‘ena si mia ataia.