Salamo 15 - Buki Tabu Lowaenei 1919

SALAMO 15.

¹ Ieoba, iaita ‘imu anua‐tabenakele ‘ena ‘i da miami? Iaita ‘imu anua tabu ‘ena ‘i da miami?

² Tauna ‘i tautauia paruparu, ta bubuna paruparuna ‘i guiguinue, Ta ‘atenaia ‘i ona ‘ai‘aila.

³ Tauna nigea ‘i da simana kabokabo meianega, Nai ‘i da guinua geiogeioi gosiana ‘enaia, Nai gosiana ‘i da awa to‘umaliena.

⁴ Tauna matanaia to guitoasa ‘i sinarina; Ta taudi Ieoba si matautena i ‘amaiabedi. Tauna ona‐‘upa‘upa manuna i ‘elo‘uia, ta nigea ‘i gibuni.

⁵ Tauna nigea ‘ina mani ‘i da ‘ebwaea sabi loeposeana, Nai pari ‘i da ‘ewena tauna nigea ‘i to‘umalina ‘enega. Tauna iage gete ‘i guinuedi gea‘abo ‘i da loniu.