Salamo 147 - Buki Tabu Lowaenei 1919

SALAMO 147.

¹ Ieoba wa da tupuna; Wari tuputupu ‘ida Eaubada ‘ena ‘i bobo‘ana ta ‘enega: ‘Ana nono ‘i bobo‘ana ta ‘enega, ta tuputupu ‘ana ‘ita ‘i bobo‘ana.

² Ieoba Ierusalema i ‘abi tu‘eiena; Iseraela ‘ina to mia to‘umali ‘i egogonedi rererea.

³ Taudi ‘atedi ‘i episarina ‘i gi‘ebobo‘anedi, Ta ‘adi ‘abiiama ‘i paimidi.

⁴ Kwadima ‘adi iau ‘i sawena; ‘I eesedi iauiaudi.

⁵ ‘Ida Inapwana ‘i sinabwana, ta ‘i pa‘ara waiwaiega; ‘Ina sinasinapu nigea ‘ana ‘ebelosaroamo.

⁶ Ieoba to nuanua ma‘anuaena ‘i gitu‘eiena: To to‘umalina i ‘aumwa‘utena bare‘uia.

⁷ Ieoba ‘ena wa da wari lotuputupuiega; Api ‘ena wa da wari tuputupu ‘ida Eaubada ‘enaia:

⁸ Tauna garewa ‘i bodena poanega, Tauna ‘usana ‘i iagena bare‘u manuna, Tauna nedu ‘i gietabwena ‘oeao ‘edia.

⁹ Iobai ‘ana masura i ‘ebwaena, Ta kaokao menonoiadi ‘edia taudi si gwanegwane.

¹⁰ Ose ‘ina pa‘ara nigea manuna ‘i guauguausoara: Tai ‘aena nigea manudi ‘i uiawana.

¹¹ Ieoba ‘i uiawana taudi si ‘amaiabena manudi, Taudi ‘ana esana si nuaiaina manudi.

¹² Ierusalema ie, Ieoba ‘u da tupuna; Siona ie, ‘imu Eaubada ‘u da tupuna.

¹³ ‘Imu ‘ari ‘ana ‘auboda ‘adi sa‘ubarabara ni‘atu ‘i giepa‘arina ta ‘enega; Natumuao ni‘atu ‘i onaobobomedi gamwagamwanimuia.

¹⁴ Guguia ‘i bubuna ‘imu raba ‘edia; Witi bobo‘ai‘ailina ‘enega ‘i loemaemu.

¹⁵ ‘Ina loina ‘i etunena bare‘u debanaia; ‘Ina ona ‘i pilipili to lomanini sana.

¹⁶ Sinou i ‘ebwaea wula ‘atua; Gaguna wakewakekena ‘i giesawarina karikau ‘atua.

¹⁷ ‘Ina boasipatuna i ‘ulenawa tomwatomwa ‘atua: Iaita ‘i da tooro ‘ina gogai matanaia?

¹⁸ ‘Ina ona ‘i etuetunenawa, ta ‘enega si dogadoga: ‘Ina iagila ‘i bubuna be ‘i toatoa, ta boasi si daudau.

¹⁹ ‘Ina ona ‘i e‘ita Iakobo ‘enaia. ‘Ina loina tomwanao ta ‘ina loinao Iseraela ‘enaia.

²⁰ Nigea ‘i bubuna nadigega ‘asa ‘e bweu ‘enaia: Ta ‘ina loina manudi, nigea si mwaratonidi. Ieoba wa da tupuna.