Salamo 145 - Buki Tabu Lowaenei 1919

SALAMO 145.

¹ Ia da ‘awabobo‘aneio, ‘igu Eaubada, King ie; Ta ‘amu esana ia da ‘awabobo‘anena ‘ataia.

² Asiata ‘e bweuna ‘e bweuna ia da tupuio; Ta ‘amu esana ia da tupu ‘ataena.

³ Ieoba tauna ‘i sinabwana, ta sawesawenaia ta da tupuna sinabwana; Ta ‘ana sinabwa ta loba ioge.

⁴ Epata‐tomota ‘e bweuna ‘imu guinuao ‘i da tupuna mari epata‐tomota ‘enaia, Ta ‘imu guinua waiwaidi ‘i da simana.

⁵ ‘Amu amaiaba ‘ana esaesa to sinabwa sana manuna, Ta ‘imu guinuao ‘ebenuaowanao manudi, ia da nuanua.

⁶ Ta tai si da ona ‘imu guinua didiga ‘idi waiwai manuna; Ta ‘imu bubuna sinabwana ia da simana.

⁷ ‘Imu bobo‘ana sinabwana ‘ana ‘ebenua‘i‘isi si da ‘inane, Ta ‘imu bubuna paruparuna manuna si da wari.

⁸ Ieoba ‘i oboboma, ta nua‘ole‘oleiega ‘i maa; ‘Ina gamwasoara ‘i so‘iso‘i, ta ma‘ina nua‘ole‘ole sinabwana.

⁹ Ieoba ‘i bobo‘ana iauiaudi ‘edia: Ta ‘ina nua‘ole‘ole nuadi ‘ina guinua iauiauna debadia.

¹⁰ ‘Imu guinua iauiaudi si da lotuputupu ‘emuia, Ieoba ie; Ta ‘imu to‐tapwaroro ‘esasedi si da ona obobomeio.

¹¹ ‘Imu ‘ebeloina ‘ina esaesa manuna si da gwae, Ta ‘imu waiwai manuna si da ona;

¹² Be ‘ina guinua waiwaidi si da e‘ita tai natudiao me ‘olotodi ‘edia, Ta ‘ina ‘ebeloina ‘ina mia‘etana ‘ana esaesa.

¹³ ‘Imu ‘ebeloina ‘ebeloina ‘ataia, Ta ‘imu loina ‘i mia ‘ataia epata‐tomota iauiauna ‘edia.

¹⁴ Ieoba iauiaudi si be‘ube‘u ‘i giepa‘aridi, Ta iauiaudi si a‘opu‘opu ‘i gietoorodi.

¹⁵ Iauiaudi matadi si iamwaiamwaio; Ta ‘adi masura u ‘ebwaedi tuta ‘ai‘aila ‘enega.

¹⁶ Nimaio ‘u tuneiasina, Ta iage maiawasina ‘e bweuna ‘e bweuna ‘ina nuena ‘u loemaena.

¹⁷ Ieoba ‘i paruparu ‘ina bubuna iauiauna ‘ediega, Ta ‘i oboboma ‘ina guinua iauiauna ‘ediega.

¹⁸ Ieoba iauiaudi ‘ena si bwau ‘i mia serabedia. Iauiaudi ‘ena si bwau ona ‘ai‘ailega ‘edia.

¹⁹ Taudi si matautena ‘idi nuena ‘i da gieapwesa ‘edia; ‘Idi bwau wate ‘i da nonona, ta ‘i da ‘etoseedi.

²⁰ Ieoba iauiaudi si obobomena i ‘ita‘i‘isidi; Ta to to‘umali iauiaudi ‘i da giesaoori.

²¹ ‘Awagu Ieoba ‘ana tuputupu ‘i da ‘inanena; Ta esio iauiauna ‘ana esana tabu si da onaobobomena ‘ataia ta ‘ataia.