Salamo 144 - Buki Tabu Lowaenei 1919

SALAMO 144.

¹ Ieoba ‘igu gurewa si da tupuna, Tauna nimaguao ‘i e‘itedi be si losaia, Ta nimamatagigiguao be si ‘eunua:

² ‘Igu oboboma‐nua‘ole‘ole, ta ‘igu anua‐‘ebelosaia, ‘Igu anua ketosorana, ta ‘igu to‘etoseana; ‘Igu lawa, ta tauna ‘ena ia ‘emisa; Tauna ‘igu tomota ‘i didigedi ‘agarauguia.

³ Ieoba, tai to‘ase, ta manuna ‘u pana‘ita? Nai tai natuna me‘olotona, ta manuna ‘u nuanua?

⁴ Tai iage besobeso nadigega: ‘Ana asiatao iauiaukwa sawasawara nadigega.

⁵ Ieoba ie, ‘imu garewa ‘u da lisi mwa‘utedi, ta ‘u da mwa‘utama: ‘Oeao ‘u da gitoodi, be si da e‘asu.

⁶ Namara ‘u da ‘ulenawa, ta ‘u da giesawaridi; ‘Imu gitao ‘u da etunedi, ta ‘u da giesaooridi.

⁷ Nimaio ‘u da iasitoto ‘etanega; ‘U da li‘amigu, ta boasi sinabwadi ‘ediega ‘u da ioioigu, To‘u‘umara nimadiega;

⁸ Taudi ‘awadi iage besobeso si oneone, Ta ‘ataidi ona kabokabo ‘ataina.

⁹ Eaubada ie, wari auauna ia da wari ‘emuia: ‘Ebebinobino‘o ma‘ana marakwa ‘e sanau ‘enega ia da wari tuputupu ‘emuia.

¹⁰ Tauna i ‘ebwaea ‘etoseana kiniao ‘edia: Tauna ‘ina toguinua Dabida i ‘etoseena sisi‐saia ‘ebeunua enega.

¹¹ ‘U da li‘amigu, ta ‘u da ‘etoseegu to‘u‘umara nimadiega, Taudi ‘awadi iage besobeso si oneone, Ta ‘ataidi onakabokabo ‘ataina.

¹² ‘Ena natudao me‘olotodi si da nadigega kaiwe tapwautona ‘idi tubuauiega; Ta natudao mewainedi nadigega gurewa lotupidi ‘upwa‘upwa‘ai‘ailidi anua esaesa ‘ana bubuna ‘atua;

¹³ ‘Ena ‘ida anua masura si maa, mari masura ta mari masura si miami; Ta ‘ida sipi tausanao ta teni tausanao si enatunedi ‘ida tanoao ‘edia;

¹⁴ ‘Ena ‘ida bulomakau ‘adi ‘a‘ara sinabwana; ‘Ena nigea ‘e bweu ‘i weara rugu, ta nigea ‘e bweu ‘i apweapwesa, Ta nigea ‘e bweu bwau olilisana ‘edao ‘edia;

¹⁵ Tomota nadigega ‘idi bubuna ma‘idi ‘ebeguausoara; Tamo, tomota taudi Ieoba ‘idi Eaubada, ma‘idi ‘ebeguausoara.