Salamo 143 - Buki Tabu Lowaenei 1919

SALAMO 143.

¹ Ieoba ie, ‘igu sidasida ‘u da nonona; ‘igu ‘awanoiao ‘edia ‘u da nono: ‘Imu bubuna ‘ai‘aila ‘enega, ta ‘imu bubuna paruparuna ‘enega, ‘eguia ‘u da onalimana.

² Ta gea‘abo ‘u etara ‘imu to‐guinua ma‘ieana; Matamuia nigea ‘e bweu tai maiawasina ‘i da paruparu ta ‘enega.

³ Tarauwara iaruiaruagu ‘i giedeededonina ta ‘enega; Iawasigu ni‘atu i ‘aumwa‘utena bare‘uia: ‘I loinegu be esena guguioi ‘edia ia miami, nadigega taudi ni‘aenei si mwawasa.

⁴ Ta ‘enega iaruiaruagu ‘i mwawamwawasa soraguia; ‘Ategu ‘i mwaumwau soraguia,

⁵ Asiata lowaenei ia nua‘i‘isidi; ‘Imu guinua iauiauna ia nuanua: Nimaio ‘idi guinua manuna ia nuanua.

⁶ Nimagu ia iasitotodi ‘emuia: Iaruiaruagu tonaana ‘i iapasa manuio, na‘ieana bwa‘a iadaiadana. (Sela.)

⁷ Ieoba ie, ‘u da lomanini be ‘u da ona limana ‘eguia; iaruiaruagu ‘i abe ‘i mwamwawasa: Maniniio gea‘abo ‘u da e‘etokwaiena ‘eguiega; Nai ‘abo‘agu taudi si mwa‘umwa‘uta gaulaia nadigegami.

⁸ ‘U da loinegu be ‘imu oboboma‐nua‘ole‘ole ia da nonona gonagonaia; ‘Emuia ia ‘emisa ta ‘enega: ‘U da loinegu be ‘eda ‘enega ia da tauia ia da mwaratonina; Iaruiaruaguiega ia ‘ita tu‘e ‘emuia ta ‘enega.

⁹ Ieoba ie, ‘u da ‘etoseegu ‘agu tarauwarao ‘ediega: ‘Emuia ia dena sabi ‘akwaiegu.

¹⁰ ‘U da e‘ita‘egu be ‘imu nuena ia da guinua ‘oio ‘igu Eaubada ta ‘enega: Iaruiaruaio ‘i bobo‘ana; tooro paruparu ‘ana ‘asa ‘ena ‘u da ‘au‘ewegu.

¹¹ Ieoba ie, ‘u da gietapewagu ‘amu esana leleana: ‘Imu bubuna paruparuiega iaruiaruagu ‘u da ‘au‘ewenama ‘ebeloniuiega.

¹² Ta ‘imu oboboma nua‘ole‘oleiega ‘agu tarauwarao ‘u da ‘upwa‐iauledi, Ta iauiaudi iaruiaruagu si gielo‘uiena ‘u da giesaooridi; ‘Abo‘agu ‘imu to‐guinua ta ‘enega.