Salamo 141 - Buki Tabu Lowaenei 1919

SALAMO 141.

¹ Ieoba, ni‘atu ‘emuia ia bwau; ‘U da lomanini ‘eguia: ‘Enagu ‘u da nono, ‘ena ia bwau ‘emuia.

² ‘Igu sidasida ‘i da mia ‘ai‘aila mu‘ana ‘atua matamuia; Nimagu ‘idi tooro taria asuinuanua ‘atua.

³ Ieoba ie, ‘ebe‘ita‘i‘ita ‘u da sa‘u ‘awagu matanaia; Sopagu ‘adi ‘auboda ‘u da ‘ita‘i‘isi.

⁴ ‘Ategu gea‘abo ‘u da lemena iage to‘umalina ‘e bweu ‘enaia, Be ‘i da guiguinua bubuna to‘umalina ‘ina iageao ‘edia Tai bubuna bokobokona si guinua ma‘edi; Ta ‘adi masura dibidibidi gea‘abo ‘ediega ia da ‘e‘ai.

⁵ To paruparu ‘i da unugu, gote oboboma; Ta ‘i da ba‘egu, gote bunama ‘atua debaguia; Debagu gea‘abo ‘i da guitoasena: ‘Igu sidasida ‘i da mia ‘ataia tuga ‘idi bubuna to‘umalina ‘ena ta ‘enega.

⁶ ‘Idi to‐loinao si ‘ula‐mwa‘utedi gurewa deidia; Ta ‘igu ona si da nonodi; si dibidibi ta ‘enega.

⁷ ‘Atua ‘ena ‘e bweu ‘i gesoa ta bare‘u ‘i tara wearina, Luludao si sawasawara ‘ari‘ari ‘awanaia.

⁸ Matagu ‘emuia ta ‘enega, Eaubada ‘Inapwana ie: ‘Emuia ‘igu ‘emisa ia sa‘una; gea‘abo iaruiaruagu ‘u da pilisinena be ‘i da kakaena.

⁹ Sikwa si sa‘u manugu ‘enega ‘u da ‘ita‘i‘isigu, Ta bubuna bokobokona ‘ana to‐guinuao ‘idi sunao ‘ediega.

¹⁰ To to‘umalidi taudi ‘idi gomanao ‘edia si da be‘u, Tuta ‘enega ‘abo‘agu ia dena tugai.