Salamo 140 - Buki Tabu Lowaenei 1919

SALAMO 140.

¹ Ieoba ie, ‘u da ‘etoseegu tai to‘umalinega; Tai didiga ‘enega ‘u da ‘ita‘i‘isigu:

² Taudi wasegigi si nuena ‘atedia; Si egogonedi rererea tuta iauiauna saia manuna.

³ Meiadi si geiadena ‘atua moata; Moata‐ada ‘ina darere sopa ‘ubunidia ‘i miami. (Sela.)

⁴ Ieoba ie, ‘u da giiaigu, to to‘umalina nimanega; Tai didiga ‘enega ‘u da ‘ita‘i‘isigu: Taudi si loina ‘aene ‘igu ‘ebetauia si da ‘ausepara dumedumedi.

⁵ To gagasa sikwa si sa‘u kwaiena manugu, ta baraeao; Gomana si iauiena ‘eda tupitupinega: Sunao si sa‘udi manugu. (Sela.)

⁶ Ieoba ‘ena ia gwae, ‘Oio ‘igu Eaubada: Ieoba ie, ‘igu sidasida ‘enadi ‘u da nonodi.

⁷ Eaubada ‘Inapwana ie, ‘agu ‘etoseana ‘ina pa‘ara, Asiata saia ‘enega debagu ‘u bodena.

⁸ Ieoba ie, to to‘umalina ‘ina nuenao gea‘abo ‘u da ‘ebwaea; ‘Ina wasegigi to‘umalina gea‘abo ‘u da lemena; nai si gitu‘eiedi taudi. (Sela.)

⁹ Ta taudi si sakowasiegu debadi, Sopadi taudi ‘idi wasegigi ‘i da bodedi.

¹⁰ Kebwanigita ‘ara‘arasina si da be‘u debadia: Si da ‘uledi awe sabelulu ‘enaia; Gaula ni‘uni‘udi ‘edia, be gea‘abo si da tooro limana.

¹¹ To onaona to‘umalina gea‘abo ‘i da miapa‘ara bare‘uia: Tai didiga bubuna to‘umalina ‘i da pilimuriena sabi ‘ula mwa‘utena.

¹² Ia mwaramwaratoni Ieoba to elo‘uia ‘arena ‘i da giepa‘ari. Ta gomabeso ‘ina iage paruparu ‘i da giepa‘ari.

¹³ Ona ‘ai‘aila to bubuna paruparu ‘i da lotuputupu ‘amu esana ‘ena: To tooro paruparu matamuia si da miamia.