Salamo 14 - Buki Tabu Lowaenei 1919

SALAMO 14.

¹ To euwauwa ‘atenaia ‘i gwae, Nigea ‘e bweu Eaubada. Si to‘umali, guinua geiogeioi ni‘atu si guinuedi; Nigea ‘e bweu iage bobo‘ana ‘ana to‐guinua.

² Ieoba garewega i ‘ita mwa‘uta tomota natunao ‘edia. Sabi ‘ita nai ‘aidi si mwaratonina, Eaubada si ‘ebe‘ebesa.

³ Iauiaudi si tauia dumaduma; ni‘atu si ebi‘i rererea; Nigea ‘e bweu iage bobo‘ana ‘ana to‐guinuamo, Nigea, nigea ‘e bweu.

⁴ Bubuna bokobokona ‘ana to‐guinua iauiaudi nigea nai ‘e bweu ‘idi sinasinapu? Taudi ‘igu tomota si ‘egumwaridi na‘ieana palaua si ‘e‘ani, Ta nigea si bwau Ieoba ‘enaia.

⁵ Taudi si miami matauta sinabwana ‘enaia: Eaubada to bubuna paruparuna ‘idi ‘epata ‘enaia ‘i miami.

⁶ Gomabeso ‘idi nuena wa gieomaiemaiena, Ieoba ‘ina ‘ebedena ta enega.

⁷ ‘Eguma Iseraela ‘ina ‘etoseana Sionega ‘i da apwesama! ‘Ena Ieoba ‘ina tomota ‘idi miaioniionina ‘i da ‘ilenama, Ga Iakobo ‘i da guausoara, ta Iseraela ‘i da uiawana.