Salamo 139 - Buki Tabu Lowaenei 1919

SALAMO 139.

¹ Ieoba ie, ni‘atu u ‘ita‘ita toogu, ta ‘u mwaratonigu.

² ‘Igu miatoa ta ‘igu tooro ‘u mwaramwaratoni, Nuagu ‘u sinapuna ‘edasorega.

³ ‘Igu ‘eda ta ‘igu ‘eno‘eno ‘u ‘ita toodi, Ta ‘igu ‘eda iauiaudi ‘u mwaramwaratonidi.

⁴ Nigea ‘e bweu ona meiagu ‘ena, Ta, u ‘ita, Ieoba ie, ‘u sinapuna maibo‘ana.

⁵ Nuganiguia ta muriguia ni‘atu ‘u miabodegu, Ta nimaio ‘u sa‘u ‘eguia.

⁶ Sinasinapu nadigega ‘ebenuaowana wawasae ‘eguia; ‘I mia tu‘e, nigea kapekapeana ‘ena ia tu‘e.

⁷ Mwa‘onai ia da tauiawa iaruiaruaio ‘enega? Nai mwa‘o ia da dena matamuiega?

⁸ ‘Abo ia tu‘e garewaia, ‘oio ‘ena ‘u miami: ‘Abo Seola ‘ena ‘igu ‘ebe‘eno ia bubuna, u ‘ita, ‘oio ‘ena ‘u miami.

⁹ ‘Abo gonagona papenao ia ‘ewedi, Ta ora esenanao ‘ebelosaroni ‘edia ia miami;

¹⁰ Tuga ‘ena nimaio i da ‘au‘ewegu, Ta ‘ataio ‘i da giiaigu.

¹¹ ‘Abo ia gwae, Ona ‘ai‘aila guguioi ‘i da bodegu, Ta ma‘edana ‘i sakowasiegu ‘i da boiboi;

¹² Tuga guguioi gea‘abo ‘emuiega ‘i da kwaikwaia, Ta boiboi ‘i sae ‘atua asiata; Guguioi ta ma‘edana si erererea ruarua ‘emuia.

¹³ ‘Oio tolobwagu ‘u bubudi ta ‘enega: ‘Oio ‘u bodegu sinagu gamwana ‘ena.

¹⁴ ‘Emuia ia da lotuputupu; ‘abo‘agu mwerumweruruigu didiga ta ‘ebenua‘owana ta ‘enega; ‘Imu guinuao ‘ebenuaowana; Ta iage nina iaruiaruagu ‘i mwaramwaratoni ‘ai‘aili.

¹⁵ Oogu nigea ‘i miamia kwaia ‘emuiega, ‘Ena ‘u mweruruakwaiegu, Ta ‘u bubu iomwaiomwarigu bare‘u esenanao lo‘ubunidi ‘edia.

¹⁶ Mataio oogu nigea bobo‘ai‘ailina u ‘itena, Ta ‘imu buki ‘ena oogu tomwanao u ‘etoladidi, Taudi asiata ta asiata ‘u bubudi, Tuta ‘enega nigea ‘e bweu ‘ediega ‘i miami.

¹⁷ Eaubada ie, ‘imu nuana wate bobo‘ai‘ailidi ‘eguia! ‘Adi iau to sinabwasana!

¹⁸ ‘Abo ia da sawedi, ‘adi iau kaukau ‘i pilisinena: ‘Ena ia tooro, ‘emuia tuga ia miami.

¹⁹ Ona ‘ai‘aila, Eaubada ie, to to‘umalidi ‘u da loemwawasidi: ‘Enega wa da pilisinegu, ‘omi tai sabi giedau rara.

²⁰ Si ‘inanemu geigeioi ta ‘enega, Ta ‘amu tarauwarao ‘amu esana si ‘inana besobeso.

²¹ Ieoba ie, nigea nai taudi si guitoasemu ia guitoasedi? Ta taudi si tooro matamuia nigea nai nuagu ‘i to‘umalina ‘edia?

²² Ia guitoasedi loguitoasa ‘ai‘ailega: Ia sawedi ‘agu tarauwarao.

²³ Eaubada ie, ‘u da ‘ita toogu, ta ‘ategu ‘u da mwaramwaratoni: ‘U da toogu, ta ‘igu nuanua ‘u da mwaramwaratonidi:

²⁴ Ta ‘u da ‘ita nai ‘e bweu to‘umalina ‘ina bubuna ‘eguia ‘i mia ‘ataia, Ta ‘u da nuganegu ‘eda mia ‘ataia ‘enaia.