Salamo 138 - Buki Tabu Lowaenei 1919

SALAMO 138.

¹ ‘Ategu maibo‘anega ia da lokagutoki ‘emuia: Eaubadao matadia tuputupu ia da wari ‘emuia.

² ‘Imu anua tabu matanaia ia da bwagobwago, Ta ‘amu esana ‘ena ia da lokagutoki ‘imu nua‘ole‘ole manuna ta ‘imu ona ‘ai‘aila manuna: ‘Imu ona ni‘atu ‘ana sinabwa ‘u sa‘u ‘amu esana maibo‘ana ‘etaninaia ta ‘enega.

³ Asiata ‘ena ia bwau ‘eguia ‘u onalimana, Waiwaiega ‘u lemegu iaruiaruagu ‘enaia.

⁴ Ieoba ie, bare‘u ‘ina king iauiaudi ‘emuia si da lotuputupu, ‘Awaio ‘ina ona ni‘atu si nonodi ta ‘enega.

⁵ Tamo, Ieoba ‘ina bubuna manudi si da wari; Ieoba ‘ina esaesa ‘i sinabwana ta ‘enega.

⁶ Ona ‘ai‘aila Ieoba to lo‘etana ta ‘enega, ga to mia mwa‘uta ‘i nonodi; Ta to gagasa ‘i mwaramwaratonidi ‘edasorega.

⁷ ‘Abo ‘ebeloniu gamwagamwanaia ia lopilidadana, ‘u da giebobo‘ana limegu; Nimaio ‘u da iasitotona ‘agu tarauwarao ‘idi gamwasoara ‘enaia, Ta ‘ataio ‘i da ‘etoseegu.

⁸ Iage manugu Ieoba ‘i da giebobo‘ai‘ailina: Ieoba ie, ‘imu nua‘ole‘ole ‘i mia ‘ataia; Nimaio tauio ‘idi guinuao gea‘abo ‘u da e‘idi‘idiedi.