Salamo 136 - Buki Tabu Lowaenei 1919

SALAMO 136.

¹ Ieoba ‘ena wa da lotuputupu; tauna ‘i bobo‘ana ta ‘enega: ‘Ina nua‘ole‘ole ‘i mia ‘ataia ta ‘enega.

² Eaubadao ‘idi Eaubada ‘ena wa da lotuputupu: ‘Ina nua‘ole‘ole ‘i mia ‘ataia ta ‘enega.

³ ‘Inapwanao ‘idi ‘Inapwana ‘ena wa da lotuputupu: ‘Ina nua‘ole‘ole ‘i mia ‘ataia ta ‘enega.

⁴ Tauna tebweuna ‘ebenuaowana sinabwadi ‘i guinuedi ‘enaia: ‘Ina nua‘ole‘ole ‘i mia ‘ataia ta ‘enega.

⁵ Tauna sinasinapuiega garewa ‘i mweruruidi ‘enaia: ‘Ina nua‘ole‘ole ‘i mia ‘ataia ta ‘enega.

⁶ Tauna bare‘u ‘i gineasina boasi debadia ‘enaia: ‘Ina nua‘ole‘ole ‘i mia ‘ataia ta ‘enega.

⁷ Tauna ma‘edana sinabwadi ‘i mweruruidi ‘enaia: ‘Ina nua‘ole‘ole ‘i mia ‘ataia ta ‘enega:

⁸ Sinara be asiata ‘i da loinei: ‘Ina nua‘ole‘ole ‘i mia ‘ataia ta ‘enega:

⁹ Nawarae ta kwadimao be boiboi si da loinei: ‘Ina nua‘ole‘ole ‘i mia ‘ataia ta ‘enega.

¹⁰ Tauna Aigupito ‘i unudi ‘idi tomatua ‘ediega ‘enaia: ‘Ina nua‘ole‘ole ‘i mia ‘ataia ta ‘enega:

¹¹ Ta Iseraela i ‘au‘ewedima gamwagamwanidiega: ‘Ina nua‘ole‘ole ‘i mia ‘ataia ta ‘enega:

¹² Nimana waiwaiega, ta nimana iasiiasitotoega: ‘Ina nua‘ole‘ole ‘i mia ‘ataia ta ‘enega.

¹³ Tauna Ora Bweabwearina ‘i weara ruena tauna ‘ena: ‘Ina nua‘ole‘ole ‘i mia ‘ataia ta ‘enega:

¹⁴ Ta Iseraela ‘i bubudi be si rubwarena: ‘Ina nua‘ole‘ole ‘i mia ‘ataia ta ‘enega:

¹⁵ Ta Parao ta ‘ina boda i ‘ulamwa‘utedi Ora Bweabwearina ‘enaia: ‘Ina nua‘ole‘ole ‘i mia ‘ataia ta ‘enega.

¹⁶ Tauna ‘ina tomota ‘i nuganedi mitawaia, tauna ‘ena: ‘Ina nua‘ole‘ole ‘i mia ‘ataia ta ‘enega.

¹⁷ Tauna kiniao sinabwadi ‘i unudi ‘enaia: ‘Ina nua‘ole‘ole ‘i mia ‘ataia ta ‘enega:

¹⁸ Ta kiniao ‘adi nono sinabwana ‘i loemwawasidi; ‘Ina nua‘ole‘ole ‘i mia ‘ataia ta ‘enega:

¹⁹ Siiona me Amora ‘adi king: ‘Ina nua‘ole‘ole ‘i mia ‘ataia ta ‘enega:

²⁰ Ta Oga Basana ‘ana king: ‘Ina nua‘ole‘ole ‘i mia ‘ataia ta ‘enega:

²¹ Ta ‘idi ‘asa i ‘ebwaea‘edi ‘egu‘eguiai manuna: ‘Ina nua‘ole‘ole ‘i mia ‘ataia ta ‘enega:

²² Tuga ‘egu‘eguiai Iseraela ‘ina toguinua ‘enaia: ‘Ina nua‘ole‘ole ‘i mia ‘ataia ta ‘enega:

²³ Tauna ‘i nua‘i‘isida ‘ena ta mia mwa‘uta: ‘Ina nua‘ole‘ole ‘i mia ‘ataia ta ‘enega:

²⁴ Ta ni‘atu ‘ada tarauwarao ‘ediega i ‘etoseeda: ‘Ina nua‘ole‘ole ‘i mia ‘ataia ta ‘enega.

²⁵ Masura i ‘ebwaea esio iauiauna ‘edia: ‘Ina nua‘ole‘ole ‘i mia ‘ataia ta ‘enega.

²⁶ Garewa ‘ina Eaubada ‘ena wa da lotuputupu: ‘Ina nua‘ole‘ole ‘i mia ‘ataia ta ‘enega.