Salamo 135 - Buki Tabu Lowaenei 1919

SALAMO 135.

¹ Ieoba wa da tupuna. Ieoba ‘ana esana wa da tupuna; Wa da tupuna, ‘Omi Ieoba ‘ina toguinuao;

² ‘Omi wa tooro Ieoba ‘ina anua ‘enaia, ‘Ida Eaubada ‘ina anua ‘ana ‘atamanao ‘edia.

³ Ieoba wa da tupuna; Ieoba ‘i bobo‘ana ta ‘enega: Tuputupu wa da wariedi ‘ana esana ‘enaia; ‘ana esana ‘ebeguausoara ta ‘enega.

⁴ Ieoba ni‘atu Iakobo i ‘esinuena tauna manuna ta ‘enega, Ta Iseraela ‘ina gwegwe tebweuna manuna.

⁵ Ia mwaramwaratoni Ieoba ‘i sinabwana ta ‘enega, Ta ‘ida ‘Inapwana eaubadao iauiaudi ‘i sinabwa sinedi.

⁶ To‘ase nai Ieoba ‘i nuanuana, tauna ‘i guinuena, Garewaia ta bare‘uia, ora ‘edia ta ni‘u iauiaudi ‘edia.

⁷ Tauna ‘i loina ga bwawa ‘i tu‘e bare‘u ‘ana ‘ebelosaroniao ‘ediega: Namara ‘i bubudi ‘usana manuna; ‘Ina ‘ebelogwegwe ‘ediega iagila ‘i me‘ena.

⁸ Tauna Aigupito ‘ina tomatua ‘i unudi, Tai ta iobai ruarua.

⁹ Aigupito ie, we‘iwe‘iiaiaiao ta ‘ebenuaowanao ‘i etunedi gamwagamwanimuia, Parao ‘enaia, ta ‘ina to‐guinua iauiaudi ‘edia.

¹⁰ Tauna ‘ebeloina iauna ‘i unudi, Ta ‘inapwanao to ewaiwaiao ‘i loemwawasidi;

¹¹ Siiona me Amora ‘adi king, Ta Oga Basana ‘ana king, Ta Kanania ‘ina ‘ebeloina iauiaudi:

¹² Ta ‘idi ‘asa i ‘ebwaea‘edi ‘egu‘eguiai manuna, ‘Egu‘eguia Iseraela ‘ina tomota ‘edia.

¹³ Ieoba ie, ‘amu esana ‘i mia ‘ataia; Ieoba ie, ‘amu ‘ebenua‘i‘isi epata tomota iauiauna ‘edia.

¹⁴ Ieoba ‘ina tomota ‘i da loinedi ta ‘enega, Ta nuami ‘i da gibunina ‘ina to guinuao manudi.

¹⁵ ‘Ebeloinao ‘idi tokwarui sileba ta gola, Tai nimadiao ‘idi guinua.

¹⁶ Ma‘awadi, ta nigea si onaona; Mamatadi, ta nigea si ‘ita‘ita;

¹⁷ Matenadi, ta nigea si nonono; Ta nigea ‘e bweu iawasidi ‘awadia.

¹⁸ Taudi si bubudi si da na‘ieadi; Tamo, ‘e bweuna ‘e bweuna ‘edia i ‘emisa.

¹⁹ Iseraela ‘ina susu ie, Ieoba wa da tupuna: Aarona ‘ina susu ie, Ieoba wa da tupuna:

²⁰ Lebi ‘ina susu ie, Ieoba wa da tupuna: ‘Omi Ieoba wa matautena, Ieoba wa da tupuna.

²¹ Ieoba ta da tupuna Sionega, Tauna Ierusalema ‘ena ‘i miami. Ieoba wa da tupuna.