Salamo 132 - Buki Tabu Lowaenei 1919

SALAMO 132.

¹ Ieoba, Dabida manuna ‘Ina elo‘uia iauiauna ‘u da nua‘i‘isi;

² Ieoba ‘ena i ‘inana, Ta Iakobo ‘ina To‐ewaiwai Tebweuna ‘ena ‘i ona‘upa‘upa:

³ Ona ‘ai‘aila gea‘abo ia da mai ‘igu anua ‘ina tabenakele ‘enaia, Nai ia da tu‘e ‘igu ‘ebe‘eno ‘enaia;

⁴ Matagu gea‘abo ia da tagwara be si da ‘enomwataia, Nai mataiaragu si da kwadudu;

⁵ Ga ‘e bweu esena Ieoba manuna ia da loba bemi, Tabenakele ‘e bweu Iakobo ‘ina To Ewaiwai Tebweuna manuna.

⁶ Wa ‘ita, ‘a nonona Eparata ‘ena: ‘A lobena kaiwe ‘ana mitawa ‘enaia.

⁷ ‘Ina tabenakeleao ‘edia ‘a da rugu; ‘Aena ‘ana ‘ebesa‘u ‘ena ‘a da bwagobwago.

⁸ Ieoba ie, ‘u da tooro, ‘imu ‘ebe‘eiawai‘ata ‘enaia; ‘Oio, ta ‘imu waiwai ‘ana dedewaga.

⁹ ‘Imu to‐tariao si da e‘oama bubuna paruparuiega; Ta ‘imu to‐esasenao si da bwau guausoara manuna.

¹⁰ ‘Imu to‐guinua Dabida manuna ‘Imu ‘oro‘oroina gea‘abo maninina ‘u da giesana‘ilena.

¹¹ Ieoba ni‘atu ‘i ona‘upa‘upa Dabida ‘enaia ona‘ai‘ailega; Gea‘abo ‘enega ‘i da sana‘ila: ‘Ooio uanega ia da sa‘u ‘imu ‘ebemi esaesa ‘enaia.

¹² ‘Abo natumuao ‘igu ona‘upa‘upa si da ‘ita‘i‘isina Ta ‘igu ‘ebe‘ita ia da e‘ita ‘edia, Natudiao wate ‘imu ‘ebemi esaesa ‘ena si da miatoa ‘ataia.

¹³ Ieoba Siona ni‘atu i ‘esinuena ta ‘enega; ‘I nuanuana ‘ina anua manuna.

¹⁴ Gete ‘igu ‘ebe‘eiawai‘ata ‘ataia: Gete ‘ena ia da miami; ni‘atu ia nuanuana ta ‘enega.

¹⁵ ‘Ina egogona masura ia da ona oboboma ‘ai‘ailina: ‘Ina gomabeso ia da giebobo‘anedi masurega.

¹⁶ ‘Ina to tariao wate ia da e‘otedi ‘etoseanega: Ta ‘ina to‐esasenao si da bwau toila guausoara manuna.

¹⁷ Gote ‘ena Dabida kunana ia da gietabwa: Maieare ni‘atu ia sa‘una ‘igu ‘oro‘oroina manuna.

¹⁸ ‘Ana tarauwarao ia da e‘otedi omaiamaia ‘enega: Ta tauna ‘ena ‘ana peaula esaesa ‘i da sinabwa.