Salamo 129 - Buki Tabu Lowaenei 1919

SALAMO 129.

¹ Tuta iauna ‘agu elo‘uia si sa‘usa‘u ‘igu tubuauiega, Iseraela ‘i da ona gete ‘enega;

² Tuta iauna ‘agu elo‘uia si sa‘usa‘u ‘igu tubuauiega: Ta nigea si ewaiwai ‘eguia.

³ To gesoa guaugu ‘ena si gesoa; Si gesoa sasena duduradi.

⁴ Ieoba ‘ina bubuna paruparu: To to‘umalidi ‘idi barae i ‘upwedi.

⁵ Iauiaudi Siona si guitoasena, Si da omaiamaia ta si da ‘ilawa.

⁶ Si da enedu na‘ieana anua debadia, Tauna nigea ‘i tabwa tu‘e ga ‘i gimi ‘oaperu:

⁷ ‘Enega to ‘upwa nigea nimanega ‘i sapwara, Nai tauna bwagila ‘i bwagilidi lumalumanega ‘i sapwara.

⁸ Ta taudi si tautauia deinaia nigea si gwaegwae, Ieoba ‘ina onaoboboma ‘emia ‘i da miami; Ieoba ‘ana esanega ‘a onaobobomeio.