Salamo 126 - Buki Tabu Lowaenei 1919

SALAMO 126.

¹ ‘Ena Ieoba Siona ‘ana mia ionaiona ‘i gibuni limena, ‘Abo‘ada nadigega taudi si madawara.

² Ga ‘awada si maa ‘edagiega, Ta meiada wariega. Ga si gwae ‘ebeloinao gamwagamwanidia, Ieoba ni‘atu iage sinabwadi ‘i guinuedi manudi.

³ Ieoba iage sinabwadi ni‘atu ‘i guinuedi manuda: Iage nidi ‘ediega ta guausoara.

⁴ Ieoba ie, ‘ima miaioniionina ‘u da gibuni limena, ‘Atua boasi daudaudi Iarasi ‘ena.

⁵ Taudi si ‘aso mataseruiega si da sesoi guausoarega.

⁶ ‘Abo ‘ina ‘edega ‘i tautauia ma‘ina dedo, witi ‘atuna makeigana i ‘ewena; ‘I da ‘ilama ma‘ina guausoara, ‘ina bwagilao i ‘a‘aridi.