Salamo 124 - Buki Tabu Lowaenei 1919

SALAMO 124.

¹ ‘Abo Ieoba nigea tauna ni‘atu ma‘eda, Iseraela gete ‘enega ‘i da gwae;

² ‘Abo Ieoba nigea tauna ni‘atu ma‘eda, ‘Ena tomota si tooro matadaia:

³ Ga si da toneda maiawasida, ‘Ena ‘idi gamwasoara ‘i iaiiai ‘edaia:

⁴ Ga boasi si siwa ‘apwarida, Boasi daudauna iaruiaruada ‘i siwa uiosina:

⁵ Ga boasi gagasidi iaruiaruada si siwa uiosina.

⁶ Ieoba ta da tupuna, Tauna nigea ‘i tagwareda be ta esilae saradi ‘ediega.

⁷ Iaruiaruada ‘i dena ‘atua manua to ai‐manua ‘idi sikwa ‘enega; Sikwa ni‘atu i ‘upena, ta ‘abo‘ada ta dena.

⁸ ‘Ada leme Ieoba ‘ana esana ‘enaia, Tauna garewa ta bare‘u ‘i mweruruidi.