Salamo 119 - Buki Tabu Lowaenei 1919

SALAMO 119.

¹ Taudi bobo‘ai‘ailidi ‘eda ‘enaia taudi maguausoaridi, Taudi si tautauia Ieoba ‘ina loina ‘enaia.

² Taudi ‘ina e‘itao si ‘ita‘i‘isi, Taudi si ‘ebesena ‘atedi maibo‘anega, taudi maguausoaridi.

³ Tamo, bubuna nigea paruaru nigea ‘e bweu si guinuena; Si tautauia ‘ina ‘edao ‘ediega.

⁴ ‘Imu ona ‘ebe‘ita‘i‘isiao ni‘atu ‘u oneone, Be ‘enega ‘a da ‘ita‘i‘isi ‘ai‘ailidi.

⁵ ‘Eguma ‘igu ‘eda si mia pa‘ara Be ‘imu loina tomwanao ia da ‘itaiisidi!

⁶ Ta ‘enega gea‘abo ia da omaiamaia, ‘Ena ‘imu etara paruparudi ia da nonodi.

⁷ ‘Ate paruparuiega ia da lokagutoki ‘emuia, Ena ‘imu loina paruparudi ia pana‘isidi.

⁸ ‘Imu loina tomwanao ia da ‘ita‘i‘isidi: Gea‘abo ‘u da e‘idi‘idiegu maibo‘ana.

⁹ Mwa‘adega tubuau ‘ina ‘eda ‘i da gie‘esasena? ‘Ita‘i‘isiega na‘ieana ‘imu ona.

¹⁰ ‘Ategu maiboanega ni‘atu ia ‘ebesemu: Gea‘abo ‘u da tagwaregu be ‘imu ona ‘ediega ia da lopilidadana daita.

¹¹ ‘Imu ona ni‘atu ia sa‘una ‘ateguia, Be ‘enega gea‘abo ia da loegesi ‘emuia.

¹² Ieoba ie, Oio ma‘amu tuputupu: ‘Imu loina tomwanao ‘u da e‘ita ‘eguia.

¹³ ‘Awaio ‘ina etara iauiaudi Sopagu ‘ediega ia simanedi.

¹⁴ ‘Imu e‘itao ‘idi ‘eda ‘ena ia guausoara, Sinabwana nadigega oesi iauiaudi ‘edia.

¹⁵ ‘Imu ona‐‘ebe‘ita‘i‘isi ‘edia ia da nuanua, Ta ‘imu ‘edao ‘edia ia da ‘amaiabe.

¹⁶ ‘Imu loina tomwanao ‘edia ia da gieguausoarigu: ‘Imu ona gea‘abo ia da nuapupurena.

¹⁷ ‘Imu to guinua ‘ena ‘u da bubuna ‘ai‘aila, be ia da bobo‘ana; Ta ‘enega ‘imu ona ia da ‘ita‘i‘isina.

¹⁸ Matagu ‘u da gibaridi, be‘enega Iage ‘ebenuaowana ia da ‘itedi ‘imu loina ‘enega.

¹⁹ ‘Abo‘agu ia ‘eto‘u‘umara bare‘uia: ‘Imu ona gea‘abo ‘u da sa‘u kwaiedi ‘eguiega.

²⁰ Iaruiaruagu i ‘ewearina ‘ina nuanuana sinabwana manuna ‘Imu etara ‘edia tuta iauiauna.

²¹ To gagasa ma‘adi elia ‘u ba‘edi, Taudi ‘imu ona ‘ediega si lopilidadana daita.

²² Ba‘e ta ‘ebesinara ‘u da ‘ewaiauledi ‘eguiega; Ni‘atu ‘imu e‘itao ia nua‘i‘isidi ta ‘enega.

²³ ‘Inapwanao wate si miatoa ta manugu si gwaegwae: Ta ‘imu to guinua ‘i nuanua ‘imu loina tomwanao ‘edia.

²⁴ ‘Imu e‘itao wate ‘igu guausoara Ta ‘igu nuanua ‘ina taiao.

²⁵ Iaruiaruagu kau ‘ena ‘i mia‘i‘ita: ‘Imu ona nadigega ‘u da gietapewagu.

²⁶ ‘Igu edao ia simanedi, ta ‘eguia ‘u onalimana: ‘Imu loina tomwanao ‘u da ‘e‘ita ‘eguia.

²⁷ ‘Imu ona‐‘ebe‘ita‘i‘isiao ‘idi ‘eda ‘u da giepana‘isina ‘eguia: Ga ‘imu guinua ‘ebenuaowana manudi ia da nuanua.

²⁸ Iaruiaruagu ‘i doga mwau manuna: ‘U da giewaiwaiegu ‘imu ona na‘ieana.

²⁹ Kabokabo ‘ana ‘eda ‘u da ‘ewena ‘eguiega: Ta ‘imu loina ‘u da ‘ebwaegu ma‘imu nua‘ole‘ole.

³⁰ Bubuna ‘ai‘aila ‘ina ‘eda ni‘atu ia ‘esinuena: ‘Imu etarao ni‘atu ia sa‘udi mataguia.

³¹ ‘Imu e‘itao ‘edia ia mia‘i‘ita: Ieoba ie, gea‘abo ‘agu omaiamaia ‘u sa‘usa‘u ‘eguia.

³² ‘Imu ona ‘idi ‘eda ‘enega ia da pili, ‘Ena ‘ategu ‘u da giesinabwa.

³³ Ieoba ie, ‘imu loina tomwanao ‘idi ‘eda ‘u da e‘ita ‘eguia: Ta ia da giiaina ga ‘ebelosaroni.

³⁴ Pana‘ita ‘u da ‘ebwaegu, ta ‘imu loina ia da giiaina; Tamo, ia da ‘ita‘i‘isina ‘ategu maibo‘anega.

³⁵ ‘U da tauiegu ‘imu ona ‘idi ‘eda ‘enaia: ‘Ena ia guausoara ta ‘enega.

³⁶ ‘Imu e‘itao ‘edia ‘ategu ‘u da gibunina, Ta gea‘abo iato‘ai ‘enaia.

³⁷ Matagu ‘u da giesana‘iledi ‘ita iage besobeso ‘enega, Ta ‘u da gietapewagu ‘imu ‘eda ‘edia.

³⁸ ‘Imu ona ‘u da gipa‘ara ‘imu to‐guinua ‘enaia, Tauna ‘amu matauta ‘ina iage.

³⁹ ‘Agu ‘ebesinara tauna ia ‘atesa‘ara manuna ‘u da ‘ewa iaulei; ‘Imu etarao si bobo‘ana ta ‘enega.

⁴⁰ U ‘ita, ‘imu ona‐‘ebe‘ita‘i‘isi manuna ia gewagewana: ‘Imu bubuna paruparu ‘ena ‘u da gietapewagu.

⁴¹ ‘Imu nua‘ole‘oleao wate si da mai ‘eguia, Ieoba ie, Tuga ‘imu ‘etoseana, na‘ieana ‘imu ona.

⁴² Ga nadigega tauna ‘i ba‘egu manuna ma‘igu ona‐limana; ‘Imu ona ‘ena ia ‘emisa ta ‘enega.

⁴³ Ona ‘ai‘aila gea‘abo ‘u da ‘ewa maibo‘ana ‘awaguiega; ‘Imu etarao ‘edia ia nuaiai ta ‘enega.

⁴⁴ Ga nadigega ‘imu loina ia da ‘ita‘i‘isina ‘Ataia ta ‘ataia.

⁴⁵ Ta ia da lopilidadana besobeso; ‘Imu ona ‘ebe‘ita‘i‘isi ni‘atu ia ‘ebesena ta ‘enega.

⁴⁶ ‘Imu e‘itao manudi wate ia da ona kiniao matadia, Ta gea‘abo ia da omaiamaia.

⁴⁷ Ta ia da gieguausoarigu ‘imu ona ‘edia, Taudi ia obobomedi.

⁴⁸ Nimagu wate ia da gilagasidi ‘imu ona ‘edia, taudi ia obobomedi; Ta ia da nuanua ‘imu loina tomwanao ‘edia.

⁴⁹ Ona nina ‘u da nua‘i‘isi ‘imu toguinua ‘enaia, ‘Agu nuaiai ‘u sa‘una ‘eguia ta ‘enega.

⁵⁰ Gete ‘igu nuabobo‘ana ‘igu elo‘uia ‘enaia: ‘Imu ona ‘i gietapewagu ta ‘enega.

⁵¹ To gagasa si tuietuieiegu sinabwana: Ta ‘imu loina nigea ‘enega ia tautauia bokoboko.

⁵² Ieoba ie, ‘imu etarao lowaenei ia nua‘i‘isidi, Ta ia gieguausoarigu.

⁵³ Gamwasoara iaiiai ni‘atu ‘i giiaigu, To to‘umalidi ‘imu loina si ‘ebesinena manudi.

⁵⁴ ‘Imu loina tomwanao taudi ‘igu wariao, ‘Igu mia to‘u‘umara ‘ana anua ‘enaia.

⁵⁵ Ieoba ie, ‘amu esana ia nua‘i‘isina boiboiia, Ta ‘imu loina ni‘atu ia ‘ita‘i‘isina.

⁵⁶ Gete ia ‘ewena ni‘atu, ‘Imu ona‐‘ebe‘ita‘i‘isi ia giiaidi manuna.

⁵⁷ Ieoba tauna ‘agu ‘egu‘eguia: Ni‘atu ia gwae ‘aene ‘imu ona ia da ‘ita‘i‘isidi.

⁵⁸ ‘Imu nua‘ole‘ole ia ‘awanoi ‘ategu maibo‘anega: ‘U da ‘atenua‘ole‘oleiegu ‘imu ona na‘ieana.

⁵⁹ ‘Igu ‘edao manudi ia nuanua, Ta ‘aegu ia giesana‘iledi ‘imu e‘itao ‘edia.

⁶⁰ Ia lomanini, ta nigea ia miamialia, Be ‘imu ona ia ‘ita‘i‘isidi.

⁶¹ To to‘umalidi ‘idi barae si losipwa sakowasiegu; Ta ‘imu loina nigea ia nuapupurena.

⁶² Niuniuwanaia ia da tooro be ‘emuia ia da lokagutoki ‘Imu etarao paruparudi manudi.

⁶³ ‘Abo‘agu iauiaudi si matautemu gosedi, Ta taudi ‘imu ona ‘ebe‘ita‘i‘itao si ‘ita‘i‘isidi gosedi.

⁶⁴ Ieoba ie, bare‘u ‘i maa ‘imu nua‘ole‘oleiega: ‘Imu loina tomwanao ‘eguia ‘u da e‘ita‘edi.

⁶⁵ ‘Imu toguinua ‘ena ni‘atu ‘u bubuna ‘ai‘aila, Ieoba ie, ‘imu ona na‘ieana.

⁶⁶ Etara bobo‘ana ta sinasinapu, ‘u da e‘ita‘edi ‘eguia; ‘Imu ona ni‘atu ia iaredi ta ‘enega.

⁶⁷ ‘Igu elo‘uia nuganinaia ia tauia gesi; Ta gete ‘enega ‘imu ona ia ‘ita‘i‘isina.

⁶⁸ ‘Oio ‘u bobo‘ana, ta bobo‘ana ‘u guinuena; ‘Imu loina tomwanao ‘u da e‘ita‘edi ‘eguia.

⁶⁹ To gagasa ona kabokabo si bubuna manugu: ‘Ategu maibo‘anega ‘imu ona‘ebe‘ita‘i‘itao ia da giiaidi.

⁷⁰ ‘Atedi ‘i momonana iapa ‘atua; Ta ‘abo‘agu ‘imu loina ‘ena ia guausoara.

⁷¹ ‘I bobo‘ana manugu ‘igu elo‘uia; Be ‘enega ‘imu loina tomwanao ia da nonodi.

⁷² ‘Awaio ‘ina loina ‘i bobo‘ana wawasae ‘eguia Gola ta sileba tausanao ‘edia.

⁷³ Nimaio si mweruruigu ta si bubugu: Sinasinapu ‘u da ‘ebwaegu, be ‘imu ona ia da nonodi.

⁷⁴ Taudi si matautemu si da ‘itegu ta si da guausoara; ‘Imu ona ‘ena ni‘atu ia nuaiai ta ‘enega.

⁷⁵ Ieoba ie, ia mwaramwaratoni ‘imu etarao si paruparu, Ta bubuna ‘ai‘ailega ‘u unugu.

⁷⁶ Ia sideio, ‘imu oboboma nua‘ole‘ole ‘i da ‘igu guausoara manuna, Na‘ieana ‘imu ona ‘imu toguinua ‘enaia.

⁷⁷ ‘Imu nua‘ole‘ole nuadi si da mai ‘eguia, be ‘enega ia da bobo‘ana: ‘Imu loina ‘igu ‘ebeguausoara ta ‘enega.

⁷⁸ To gagasa si da omaiamaia; ma‘idi kabo si ‘ula mwa‘utegu ta ‘enega: Ta ia da nuanua ‘imu ona‘ebe‘ita‘i‘itao ‘edia.

⁷⁹ Taudi si matautemu ‘eguia si da sana‘ilama, Ta ‘imu e‘itao si da mwaratonidi.

⁸⁰ ‘Ategu ‘i da bobo‘ai‘ailina ‘imu loina tomwanao ‘edia; Be ‘enega gea‘abo ia da omaiamaia.

⁸¹ Iaruiaruagu ‘i mwawamwawasa ‘imu ‘etoseana manuna: Ta ‘imu ona ‘ena ia nuaiai.

⁸² Matagu si tabataba ‘imu ona manuna, Tuta ‘enega ia gwae, Maisa ‘agu uiawana ‘u da sa‘u?

⁸³ ‘Abo‘agu ni‘atu bwara‐oine ‘atua ‘asu ‘enaia; Ta ‘imu loina‐tomwanao nigea ia nuanuapupure.

⁸⁴ ‘Imu to‐guinua ‘ana asiata eisa? Maisa nai etara ‘u da iagena taudi si unugu ‘edia?

⁸⁵ To gagasa gaula si saledi manugu, Taudi nigea ‘imu loina nadigega.

⁸⁶ ‘Imu ona iauiauna ona ‘ai‘ailao; Ma‘adi kabo si unugu; ‘u da lemegu.

⁸⁷ ‘I abe si gabugu bare‘u ‘enaia; Ta ‘imu ona‐‘ebe‘ita‘i‘ita nigea ia e‘idi‘idiedi.

⁸⁸ ‘Imu oboboma‐nua‘ole‘ole na‘ieana ‘u da gietapewagu; Ga nadigega ‘awaio ‘ina e‘ita ia da ‘ita‘i‘isina.

⁸⁹ Ieoba ie, tuta gea‘abo ‘i da gumwara, ‘Imu ona ‘i tooro pa‘ara garewaia.

⁹⁰ ‘Imu bubuna ‘ai‘aila epatatomota iauiauna ‘edia: Bare‘u ‘u giepa‘arina, ta ‘i miami.

⁹¹ Batua si miami ‘imu loina tomwanao na‘ieadi; Iage iauiauna ‘imu to‐guinuao ta ‘enega.

⁹² ‘Abo ‘imu loina nigea ‘igu ‘ebeguausoara, Ga ia da saoora ‘igu elo‘uia ‘enega.

⁹³ ‘Imu ona ‘ebe‘ita‘i‘isi gea‘abo ia da nuapupuredi; ‘Ediega ‘u gietapewagu ta ‘enega.

⁹⁴ ‘Abo‘agu ‘imu tai, ‘u da ‘etoseegu; ‘Imu ona‐‘ebe‘ita‘i‘isi ni‘atu ia ‘ebesedi ta ‘enega.

⁹⁵ To‐to‘umalidi ni‘atu si iamwaiamwa manugu be si giesaoorigu; Ta ‘imu e‘itao ia da nuedi.

⁹⁶ Bobo‘ai‘ailina maibo‘ana ‘ana ‘ebelosaroni ia ‘itena; Ta ‘imu ona ‘i tobababasana.

⁹⁷ ‘Imu loina ia obobomena sinabwana! Tauna ‘igu ‘ebenuanua asiata maibo‘ana.

⁹⁸ ‘Imu ona ‘ediega ‘igu sinasinapu ‘u sa‘u wawasae ta ‘agu tarauwarao ‘idi sinasinapu gidarina; Si mia ‘ataia ma‘ieagu ta ‘enega.

⁹⁹ ‘Abo‘agu ia sinasinapu wawasae ‘igu to‐e‘itao iauiaudi ‘edia; ‘Imu e‘itao ‘igu ‘ebenuanua ta ‘enega.

¹⁰⁰ Ia mwaramwaratoni wawasae ‘ina‘inapwanao ‘edia, ‘Imu ona‐‘ebe‘ita‘i‘itao ia giiaidi ta ‘enega.

¹⁰¹ ‘Aegu ia egagaredi ‘eda to‘umalina iauna ‘enega, Be ‘enega ‘imu ona ia da ‘ita‘i‘isina.

¹⁰² ‘Imu etarao nigea ‘ediega ia sanasana‘ila; ‘Oio ‘u e‘itagu ta ‘enega.

¹⁰³ ‘Imu ona si dibidibi lumwa‘etanigu ‘enaia! Tamo, dibidibi wawasae ta mu‘awa gidarina ‘awagu ‘ena!

¹⁰⁴ ‘Imu ona‐‘ebe‘ita‘i‘isi ‘ediega sinasinapu ia ‘ewena: Ta ‘enega ‘eda kabokabo iauna ia guitoasena.

¹⁰⁵ ‘Imu ona ‘i emaieare ‘aegu ‘edia, Ta ma‘edana ‘igu ‘eda ‘enaia.

¹⁰⁶ Ni‘atu ia ona‘upa‘upa, ta ia giepa‘arina, Be ‘imu ‘etara paruparudi ia da ‘ita‘i‘isidi.

¹⁰⁷ ‘Ategu ‘i uiauia sinabwana: Ieoba ie, ‘u da gietapewagu na‘ieana ‘imu ona.

¹⁰⁸ Ia sideio, Ieoba ie, ‘awagu ‘ina ‘ebwaeadaitao ‘u da ‘ewedi, Ta ‘imu ‘etarao ‘u da e‘ita ‘eguia.

¹⁰⁹ Iaruiaruagu ‘i mia‘ataia nimaguia; Ta ‘imu loina nigea ia nuapupurena.

¹¹⁰ To to‘umalidi ni‘atu sikwa si sa‘una manugu; Ta ‘imu ona‐‘ebe‘ita‘i‘isi nigea ‘ediega ia tautauia gesi.

¹¹¹ ‘Imu e‘itao ni‘atu ia ‘ewedi ‘egu‘eguiai ‘ataia; Taudi ‘ategu ‘ina guausoara ta ‘enega.

¹¹² ‘Ategu ia tagwarena be ‘imu loinatomwanao ‘i da guinuedi, ‘Ataia, tuga ‘ebelosaroni ‘enaia.

¹¹³ Taudi si enuanarua ia guitoasedi; Ta ‘imu loina ia obobomena.

¹¹⁴ ‘Oio ‘igu esena ‘ebekwaia ta ‘igu lawa: ‘Imu ona ‘ena ia nuaiaina.

¹¹⁵ ‘Omi to‘umalina ‘ana to‐guinuao ‘eguiega wa da tauia; Be ‘enega ‘igu Eaubada ‘ina ona ia da giiaidi.

¹¹⁶ ‘U da lemegu ‘imu ona na‘ieana, be ia da bobo‘ana; Ta gea‘abo ia da omaiamaia ‘igu nuaiaina manuna.

¹¹⁷ ‘U da gietoorogu, ta ia da bobo‘ana, Ta ‘imu loina‐tomwanao ia da ‘amaiabedi ‘ataia.

¹¹⁸ Iauiaudi ‘imu loina‐tomwanao ‘ediega si loegesi ni‘atu ‘u gibesobesodi; ‘Idi kabokabo ‘i iage besobeso ta ‘enega.

¹¹⁹ Bare‘u ‘ina to‐to‘umalidi iauiaudi ‘u loegumwaridi sumwana ‘atua: Ta ‘enega ‘imu e‘itao ia obobomedi.

¹²⁰ Esiogu ‘i dedera matausio manuna; Ta ‘imu etara manudi ia ‘atesa‘ara.

¹²¹ ‘Etara ta loina paruparu ni‘atu ia guinuedi: Gea‘abo ‘u pilisinegu taudi si unugu ‘edia.

¹²² ‘U da lopa‘eru ‘imu toguinua leleana bobo‘ana manuna: To gagasa gea‘abo si da unugu.

¹²³ Matagu si lo‘aoreore ‘imu ‘etoseana manuna, Ta ‘imu ona paruparu manuna.

¹²⁴ ‘Imu to‐guinua ‘ena ‘u da bubu na‘ieana ‘imu nua‘ole‘ole, Ta ‘imu loina tomwanao ‘u da e‘ita ‘eguia.

¹²⁵ ‘Abo‘agu ‘imu to‐guinua, sinasinapu ‘u da ‘ebwaegu; Be ‘enega ‘imu e‘itao ia da mwaratonidi.

¹²⁶ Ni‘atu Ieoba ‘ana tuta be ‘i da bubuna, ‘Imu loina si gibesobesona ta ‘enega.

¹²⁷ Ta ‘enega ‘imu ona ia obobomedi sinabwa wawasae Gola ‘enaia, tamo, gola ‘esasena ‘enaia.

¹²⁸ Ta ‘enega ‘imu ona‐‘ebe‘ita‘i‘ita iauiaudi iage iauiaudi manudi ia nuedi si paruparu; Ta ‘eda kabokabo iauna ia guitoasedi.

¹²⁹ ‘Imu e‘itao ‘ebenuaowana: Ta ‘enega iaruiaruagu i ‘ita‘i‘isidi:

¹³⁰ ‘Imu ‘ona ‘idi gigege ‘i giema‘edana; Mwagemwagedi ‘idi sinasinapu ‘i sa‘una.

¹³¹ ‘Awagu ia ebarina sinabwana, ta ia eiawasilagalaga; ‘Imu ona manudi ia gewagewana ta ‘enega.

¹³² ‘Eguia ‘u da sana‘ilama, ta ‘u da ‘atenua‘ole‘oleiegu, Nadigega ‘imu bubuna lowa taudi ‘amu esana si obobomena ‘edia.

¹³³ ‘Aegu ‘idi sa‘ulaga ‘u da giepa‘ari ‘imu ona ‘enaia; Ta gea‘abo ‘e bweu bubuna bokobokona ‘eguia ‘i da loiloina.

¹³⁴ Tai ‘ina bubuna mwaumwau ‘enega ‘u da ‘ewalimegu: Ga ‘imu ona ‘ebe‘ita‘i‘itao ia da ‘ita‘i‘isidi.

¹³⁵ Maniniio ‘u da tuiaiarena ‘imu to‐guinua ‘enaia; Ta ‘imu loina tomwanao ‘u da e‘ita ‘eguia.

¹³⁶ Matagu si daudau mwa‘uta boasi daudaudi ‘ediega, ‘Imu loina nigea si ‘ita‘i‘isi ta ‘enega.

¹³⁷ Ieoba ie, ‘Oio ‘imu bubuna paruparuna, Ta ‘imu etara si tooro ‘ai‘aila.

¹³⁸ ‘Imu e‘itao ‘u onedi bubuna paruparunega Ta bubuna ‘ai‘aila wawasae ‘enega.

¹³⁹ ‘Igu waiwai ‘i loegumwarigu, ‘Agu tarauwarao ‘imu ona si nuapupuredi ta ‘enega.

¹⁴⁰ ‘Imu ona i ‘esasena wawasae; Ta ‘enega ‘imu to guinua ‘i obobomena.

¹⁴¹ ‘Abo‘agu gidarigu ta sinasinarigu: Ta ‘imu ona ‘ebe‘ita‘i‘itao nigea ia nuapupuredi.

¹⁴² ‘Imu bubuna paruparu ‘i bubuna paruparu mia ‘ataia, Ta ‘imu loina ona ‘ai‘aila.

¹⁴³ Loniu ta elo‘uia ni‘atu si giiaigu: Ta ‘imu ona ‘igu ‘ebeguausoara.

¹⁴⁴ ‘Imu e‘itao si paruparu ‘ataia: Sinasinapu ‘u da ‘ebwaegu, ta ia da bobo‘ana.

¹⁴⁵ Ni‘atu ia bwau ‘ategu maibo‘anega: Ieoba ie, ‘eguia ‘u da ona limana; ‘Imu loinatomwanao ia da ‘ita‘i‘isidi.

¹⁴⁶ Ni‘atu ia bwau ‘emuia; ‘u da ‘etoseegu, Ta ‘imu e‘itao ia da ‘ita‘i‘isidi.

¹⁴⁷ Tomwa ‘i ulisi ia nuganena, ta ia bwau: ‘Imu ona ‘edia ia nuaiai.

¹⁴⁸ Matagu boiboi tomwanao si iaweiawe nuganedi, Be ‘imu ona ‘ena ia da nuanua.

¹⁴⁹ ‘Enagu ‘u da nonona na‘ieana ‘imu oboboma nua‘ole‘ole: Ieoba ie, ‘u da gietapewagu ‘imu etarao na‘ieadi.

¹⁵⁰ Taudi to‘umalina si muria si doroma; ‘Imu loinega si mia ‘edasora.

¹⁵¹ Ieoba ie, ‘oio ‘u mia serabemaia; Ta ‘imu ona iauiaudi ona ‘ai‘aila.

¹⁵² Lowaeneiega ia mwaratoni ‘imu e‘itao ‘ediega, ‘Aene ni‘atu ‘u sa‘u pa‘ara ‘ataedi.

¹⁵³ ‘Igu elo‘uia ‘u da nuena, ta ‘u da ‘etoseegu; ‘Imu loina nigea ia nuapupurena ta ‘enega.

¹⁵⁴ ‘Igu iage ‘arena manuna ‘u da ona, ta ‘u da ‘ewalimegu; ‘U da gietapewagu ‘imu ona na‘ieana.

¹⁵⁵ ‘Etoseana to to‘umalidi ‘ediega ‘i mia ‘edasora; ‘Imu loina tomwanao nigea si ‘ebesa ta ‘enega.

¹⁵⁶ Ieoba ie, ‘imu nua‘ole‘ole nuadi si sinabwa: ‘U da gietapewagu ‘imu etara na‘ieadi.

¹⁵⁷ ‘Agu to unuao ta ‘agu tarauwarao si iau; Ta ‘imu e‘itao nigea ‘ediega ia tautauia gesi.

¹⁵⁸ To bubuna wasegigi ia ‘itedi, ta ia dedoi; ‘Imu ona nigea si ‘ita‘i‘isi ta ‘enega.

¹⁵⁹ ‘Igu oboboma ‘imu ona‐‘ebe‘ita‘i‘itao ‘edia ‘u da nuena: Ieoba ie, ‘u da gietapewagu, na‘ieana ‘imu oboboma nua‘ole‘ole.

¹⁶⁰ ‘Imu ona debana ona ‘ai‘aila ‘arena; Ta ‘imu etara paruparuna ‘e bweuna ‘e bweuna ‘i mia ‘ataia.

¹⁶¹ ‘Inapwanao ni‘atu si unudaisiguia; Ta ‘ategu ‘i tooro ‘amaiaba ‘imu ona manudi.

¹⁶² ‘Imu ona manuna ia guausoara, ‘Atua ‘e bweu gwegwe sinabwana ‘i lobena.

¹⁶³ Kabokabo ia guitoasa ta nuagu ‘i to‘umali ‘ena; Ta ‘imu loina ia obobomena.

¹⁶⁴ Tuta ‘e sebeni asiata ‘e bweuna ‘enega ia tupumu, ‘Imu etara paruparudi manudi.

¹⁶⁵ Taudi ‘imu loina si obobomena guguia sinabwana si ‘ewa; Ta nigea ‘e bweu ‘idi ‘ebeesetupe.

¹⁶⁶ Ieoba ie, ‘imu ‘etoseana manuna ia nuaiai, Ta ‘imu ona ia guinuedi.

¹⁶⁷ Iaruiaruagu ‘imu e‘itao i ‘ita‘i‘isidi; Ta ia obobomedi sinabwana.

¹⁶⁸ ‘Imu ona‐‘ebe‘ita‘i‘itao ta ‘imu e‘itao ia ‘ita‘i‘isidi; ‘Igu ‘eda iauiaudi matamuia si miami.

¹⁶⁹ Ieoba ie, ‘igu bwau matamuia ‘i da mai serabemuia: Sinasinapu ‘u da sa‘u ‘eguia ‘imu ona na‘ieana.

¹⁷⁰ ‘Igu sidasida ‘i da mia matamuia: ‘Imu ona na‘ieana ‘u da ‘etoseegu.

¹⁷¹ Sopagu tuputupu si da ‘inana; ‘Imu ona tomwanao ‘u e‘itegu ta ‘enega.

¹⁷² Meiagu ‘imu ona manuna ‘i da wari; ‘Imu ona iauiauna bubuna paruparu ta ‘enega.

¹⁷³ Nimaio ‘i da apwesama sabi lemegu; ‘Imu ona ‘ebe‘ita‘i‘itao ni‘atu ia ‘esinuedi ta ‘enega.

¹⁷⁴ Ieoba ie, ‘imu ‘etoseana manuna ia gewagewana; Ta ‘imu loina ‘igu ‘ebeguausoara.

¹⁷⁵ Iaruiaruagu ‘i da bobo‘ana, ta ‘i da tupuio; Ta ‘imu etarao si da lemegu.

¹⁷⁶ Ia tauia gesi sipi loseloseena ‘atua; ‘imu to‐guinua ‘u da ‘ebesa; ‘Imu ona nigea ia nuapupuredi ta ‘enega.