Salamo 118 - Buki Tabu Lowaenei 1919

SALAMO 118.

¹ Ieoba ‘ena wa da tuputupu; tauna ‘i bobo‘ana ta ‘enega: ‘Ina nua‘ole‘ole ‘i mia ‘ataia ta ‘enega.

² Iseraela gete ‘enega ‘i da ona, ‘Ina nua‘ole‘ole ‘i mia ‘ataia.

³ Aarona ‘ina susu gete ‘enega si da ona, ‘Ina nua‘ole‘ole ‘i mia ‘ataia.

⁴ Taudi gete ‘enega Ieoba si matautena si da ona, ‘Ina nua‘ole‘ole ‘i mia ‘ataia.

⁵ ‘Igu elo‘uia ‘enega ia bwau Ieoba ‘ena: Ieoba ‘eguia ‘i ona limana ta esena sinabwana ‘ena ‘i sa‘ugu.

⁶ Ieoba ‘igu toleme; gea‘abo ia da matauta: To‘ase tai ‘i da guinua ‘eguia?

⁷ Ieoba ‘agu to‐leme taudi si lemegu gamwagamwanidia: Ta ‘enega ‘igu nuanua ia da ‘itena taudi si guitoasegu ‘edia.

⁸ ‘I bobo‘ana wawasae Ieoba ‘ena ta da ‘emisa Ta gea‘abo tai ta da ‘emisedi.

⁹ ‘I bobo‘ana wawasae Ieoba ‘ena ta da ‘emisa Ta gea‘abo ‘inapwanao ta da ‘emisa ‘edia.

¹⁰ ‘Ebeloina iauiaudi si mia sakowasiegu: Ieoba ‘ana esanega ia da ‘upwaiauledi.

¹¹ Si sakowasiegu; tamo, si sakowasiegu: Ieoba ‘ana esanega ia da ‘upwa iauledi.

¹² Mu‘awa ‘atua si sakowasiegu; si kweu ‘atua kwakwakwarao ‘adi awe: Ieoba ‘ana esanega ia da ‘upwa iauledi.

¹³ ‘Eguia u ‘ula didiga be ia da be‘u: Ta Ieoba ‘i lemegu.

¹⁴ Ieoba ‘igu waiwai ta wari; Ta ni‘atu tauna ‘agu ‘etoseana.

¹⁵ Guausoara ta ‘etoseana ‘enadi to paruparu ‘idi anuao ‘edia ‘i miami: Ieoba ‘ataina ‘i guinua waiwai.

¹⁶ Ieoba ‘ataina ‘i miatu‘e: Ieoba ‘ataina ‘i guinua waiwai.

¹⁷ Gea‘abo ia da mwawasa, ia da bobo‘ana, Ta Ieoba ‘ina guinua ia da simanedi.

¹⁸ Ieoba ni‘atu ‘i unugu sinabwana: Ta nigea ‘i tagwaregu mwawasa ‘enaia.

¹⁹ Bubuna paruparu ‘ana ‘aubodao ‘u da gigegedi ‘eguia: ‘Edia ia da rugu, ia da lokagutoki Ieoba ‘enaia.

²⁰ Gete Ieoba ‘ina ‘auboda; To paruparu ‘ena si da rugu.

²¹ Ia da lokagutoki ‘emuia, ‘eguia ‘u ona limana ta ‘enega, Ta ‘oio ni‘atu ‘agu ‘etoseana.

²² Gurewa to‘abi anua si guitoasena Tauna tupitupina debana.

²³ Gete Ieoba ‘enega; Ta ‘ebenuaowana matadaia.

²⁴ Gete asiata nina Ieoba ‘i mweruruina; Ta da guausoara be ta da uiawana ‘enega.

²⁵ Gete ‘enega ‘u da ‘etoseema, ‘a sideio, Ieoba ie: Ieoba ie, ‘a sideio, gete ‘enega mia bobo‘ana ‘u ‘da sa‘u.

²⁶ Tauna ‘i memai Ieoba ‘ana esanega ‘i da mia bobo‘ana: Ni‘atu ‘a onaobobomemi Ieoba ‘ina anuega.

²⁷ Ieoba tauna Eaubada, ta ma‘edana ni‘atu i ‘ebwaeda: Taria wa da iona baraeiega, tuga ‘ebetaria kunanao ‘edia.

²⁸ ‘Oio ‘igu Eaubada, ta ‘emuia ia da lokagutoki: ‘Oio ‘igu Eaubada, ia da tupuio.

²⁹ Ieoba ‘ena wa da lokagutoki; tauna ‘i bobo‘ana ta ‘enega: ‘Ina nua‘ole‘ole ‘i mia ‘ataia ta ‘enega.