Salamo 116 - Buki Tabu Lowaenei 1919

SALAMO 116.

¹ Ieoba ia obobomena, ‘Enagu ta ‘igu sidasida ‘i nonona ta ‘enega.

² ‘Eguia ‘i nono‘i‘isi, Ta ‘enega ‘ena ia da bwau tuta dudurana ia miami ‘enega.

³ Mwawasa ‘ina marakwao si sakowasiegu, Ta Seola ‘ina elo‘uiao si giiaigu: Loniu ta ‘ebededo ia lobedi.

⁴ Ga Ieoba ‘ana esana ‘ena ia bwau; Ieoba ie, ia sideio, iaruiaruagu ‘u da ‘etoseena.

⁵ Ieoba ‘i nua‘ole‘ole, ta ‘ipa ruparu; Tamo, ‘ida Eaubada ‘i nua‘ole‘ole.

⁶ Ieoba mwagemwagedi i ‘ita‘i‘isidi: Ia mia mwa‘uta, ga i ‘etoseegu.

⁷ Iaruiaruagu ie, ‘imu eiawai‘ata ‘ena ‘u da ‘ila; Ieoba ‘i bubuna ‘ai‘aila ‘emuia ta ‘enega.

⁸ Iaruiaruagu u ‘etoseena mwawasega ta ‘enega, Matagu mataseru ‘ediega, Ta ‘aegu be‘u ‘enega.

⁹ Ieoba matanaia ia da tauia Maiawasidi ‘idi ‘asa ‘enaia.

¹⁰ Ia iareiare, ia da ona ta ‘enega: Ia mia elo‘uia sinabwana:

¹¹ ‘Igu lomaniniega ia gwae, Tai iauiaudi to ona kabokaboiao.

¹² To‘ase ia da tagwara Ieoba ‘ena ‘Ina guinua ‘ai‘aila iauiaudi ‘eguia ta ‘enega?

¹³ ‘Etoseana ‘ana keiga ia da ‘ewena, Ta Ieoba ‘ana esana ‘ena ia da bwau.

¹⁴ ‘Igu ona‘upa‘upa ia da ‘ebwaea Ieoba ‘enaia, Tamo, ‘ina tomota iauiaudi matadia.

¹⁵ ‘Ina to ‘esasenao ‘idi mwawasa ‘ana bubuna ‘I bobo‘ai‘ailina Ieoba matanaia.

¹⁶ Ieoba ie, ona ‘ai‘aila ‘abo‘agu ‘imu to guinua: ‘Abo‘agu ‘imu toguinua, ‘imu toguinua mewainena natuna; ‘Igu ‘ebeiona ni‘atu ‘u li‘amidi.

¹⁷ Taria ‘ebelokagutoki ia da ‘ebwaemu, Ta Ieoba ‘ana esana ‘ena ia da bwau.

¹⁸ Ieoba ‘ena ‘igu ona‘upa‘upa ia da ‘ebwaea, Tamo, ‘ina tomota iauiaudi matadia;

¹⁹ Ieoba ‘ina anua ‘ana atamanao, Ierusalema ie, gamwagamwanimuia. Ieoba wa da tupuna.