Salamo 115 - Buki Tabu Lowaenei 1919

SALAMO 115.

¹ Gea‘abo ‘emaia, Ieoba ie, gea‘abo ‘emaia, Ta ‘amu esana ‘enaia ‘a da tuputupu, ‘Imu nua‘ole‘ole manuna, ta ‘imu ona‘ai‘aila manuna.

² To‘ase manuna ‘ebeloinao si da ona, Gete ‘enega mane ‘idi Eaubada?

³ Ta ‘ida Eaubada garewaia: Iage ‘i nuanuana tauna ni‘atu ‘i guinuena.

⁴ ‘Idi tokwarui sileba ta gola, Tai nimadi ‘idi guinua.

⁵ Ma‘awadi, ta nigea si onaona; Mamatadi, ta nigea si ‘ita‘ita;

⁶ Matenadi, ta nigea si nonono; Ma‘ubusudi, ta nigea si muimui;

⁷ Manimadi, ta nigea si gitoo; Ma‘aedi, ta nigea si tautauia; Ta nigea si onaona magadiega.

⁸ Taudi si mweruruidi si da na‘ieadi; Tamo, ‘e bweuna ‘e bweuna i ‘emisedi.

⁹ Iseraela ie, Ieoba ‘ena ‘u da ‘emisa. Tauna ‘idi leme ta ‘idi lawa.

¹⁰ Aarona ‘ina susu ie, Ieoba ‘ena wa da ‘emisa; Tauna ‘idi leme ta ‘idi lawa.

¹¹ ‘Omi Ieoba wa matautena, Ieoba ‘ena wa da ‘emisa: Tauna ‘idi leme ta ‘idi lawa.

¹² Ieoba ‘i nua‘i‘isida; ‘I da onaobobomeda: Iseraela ‘ina susu ‘i da ona obobomei; Aarona ‘ina susu ‘i da ona obobomei.

¹³ Taudi Ieoba si matautena ‘i da onaobobomedi, Me gidaridi ta me sinabwadi ruarua.

¹⁴ Ieoba ‘i da giesususailimi watei ta watei, ‘Omi ta natumiao.

¹⁵ ‘Omi oboobobomimi Ieoba ‘enega, Tauna garewa ta bare‘u ‘i mweruruidi.

¹⁶ Garewao Ieoba ‘ina garewao; Ta gabura ni‘atu tai natunao i ‘ebwaedi.

¹⁷ To mwawasa nigea Ieoba si tupuna, Nai ‘e bweu ‘i mwa‘uta enono ‘enaia;

¹⁸ Ta ‘abo‘ada Ieoba ta da tupuna Tuta gete ‘enega ta gea‘abo ‘i gumwagumwara. Ieoba wa da tupuna.