Salamo 112 - Buki Tabu Lowaenei 1919

SALAMO 112.

¹ Ieoba wa da tupuna. Tauna Ieoba ‘i matautena tauna ‘i bobo‘ana, Tauna ‘ina ona manudi ‘i guausoara sinabwana.

² Tubunao si da ewaiwai bare‘uia: To bubuna paruparu ‘idi ‘epatatomota si da bobo‘ana.

³ Esaesa ta oesi ‘ina anua ‘ena si miami: Ta ‘ina bubuna paruparu ‘i mia‘ataia.

⁴ Ma‘edana ‘i tooro guguioi ‘ena to‐bubuna paruparu ‘edia: Tauna ‘i oboboma, ta nua‘ole‘oleiega ‘i maa, ta ‘i paruparu.

⁵ Tai nina ‘i bubuna oboboma ta ‘i e‘ebwa‘ebwaea tauna bobo‘ana ‘i lobena; Etaraiega ‘ina iage ‘i da giiaina.

⁶ Tauna gea‘abo ‘i da loniu ‘enega; To paruparuiao ‘adi nua‘i‘isi gea‘abo ‘i da gumwara.

⁷ Tetera to‘umalina gea‘abo manuna ‘i da matauta: ‘Atena ‘i mia‘i‘ita, Ieoba ‘ena i ‘emisa.

⁸ ‘Atena ‘i miapa‘ara, gea‘abo ‘i da matauta, Ga tuta nina ‘ana tarauwarao ‘edia ‘ina nuena ‘i da ‘itena.

⁹ Ni‘atu ‘i lelewana, gomabeso ‘edia ni‘atu i ‘ebwaea; ‘Ina bubuna paruparu ‘i mia‘ataia: ‘Ina ioguli ‘i da miatu‘e ‘amaibeiega.

¹⁰ To to‘umalina ‘i da ‘itena, ta ‘i da ‘ate‘uia‘uia; ‘I da esara‘i‘ita, ta ‘i da sawara; To to‘umalina ‘ina nuena ‘i da saoora.