Salamo 109 - Buki Tabu Lowaenei 1919

SALAMO 109.

¹ ‘Igu tuputupu ‘ina Eaubada ie, gea‘abo ‘u enono;

² To to‘umalidi ‘awadi ta kabokabo ‘awana ni‘atu si ‘ebaridi mataguia ta ‘enega: ‘Eguia si onaona meia kabokaboega.

³ Wate si miasakowasiegu loguitoasa ‘ana ona ‘ediega, Ta si losaia daita ‘eguia.

⁴ ‘Igu oboboma manuna taudi si e‘agu tarauwarao: Ta ‘abo‘agu ia tagwaregu sidasida ‘enaia.

⁵ Ta to‘umalina si sa‘u ‘eguia bobo‘ana leleana, Ta loguitoasa oboboma manuna.

⁶ Tai to‘umalina ‘u da sa‘u debanaia: Ta tarauwara ‘i da tooro ‘atainaia.

⁷ ‘Ena si etaraena, ‘i da apwesama si ‘awato‘umaliena; Ta ‘ina sidasida ‘i da gibuni loegesi ‘ena.

⁸ ‘Ina asiatao si da pu‘epu‘e; Ta mari tai ‘ina ‘ebeguinua ‘i da ‘ewena.

⁹ Natunao si da pesiedao, Ta mwanena ‘i da kwabura.

¹⁰ Natunao si da ‘e tolopilidadana, ta si da sidasida; Ta ‘adi masura si da ‘ebesa ‘idi esena waboreboreao ‘ediega.

¹¹ To ‘oae ‘ina iage iauiauna ‘i da sikwedi; Ta to‘u‘umarao ‘ina guinua si da ‘oaena.

¹² Gea‘abo ‘e bweu ‘i da nua‘ole‘ole ‘ataia ‘enaia: Ta gea‘abo ‘e bweu natunao tamatamagenidi ‘i da ‘ate‘atenua‘ole‘oleiedi.

¹³ Tubunao si da ‘upwa iauledi; Epata tomota muria ‘enega ‘adi esana ‘i da kweu.

¹⁴ Tamanao ‘idi bubuna bokobokona Ieoba ‘i da nua‘i‘isina; Ta sinana ‘ina loegesi gea‘abo ‘i da kweu.

¹⁵ Ieoba matanaia si da mia ‘ataia, Be ‘enega ‘adi ‘ebenua‘i‘isi ‘i da ‘upwaiaulena bare‘uiega.

¹⁶ Tauna nigea ‘i nuena be ‘i da nua‘ole‘ole ta ‘enega, Ta tai gomabeso ta nanaewa ‘i ununa, Ta taudi ‘atedi i ‘episarina, sabi loemwawasidi.

¹⁷ Tamo, elia ‘i nuanuana, ta ‘ena ‘i mai; Ta onaoboboma nigea manuna ‘i guausoara, ta ‘i mia ‘edasora ‘enega.

¹⁸ Wate eliega ‘i e‘otena tauna ‘atua ‘ana ‘oamega, Ta ‘i mai soranaia boasi ‘atua, Ta bunama ‘atua lulunao ‘edia.

¹⁹ ‘I da ‘atua ‘oama ‘enaia tauna ‘enega ‘i bodena tauna, Ta gadiwana manuna tauna ‘enega ‘i logadiwana ‘ataia.

²⁰ Gete ‘agu tarauwarao ‘adi e‘isa Ieoba ‘enega, Ta ‘adi e‘isa taudi si onaona to‘umalina iaruiaruagu manuna.

²¹ Ta Eaubada ‘Inapwana, ‘eguia ‘u da bubuna, ‘amu esana manuna: ‘Imu nua‘ole‘ole ‘i bobo‘ana, ‘enega ‘u da ‘etoseegu,

²² ‘Abo‘agu gomabeso ta nanaewagu ta ‘enega, Ta ‘ategu ‘i eloabiiama soraguia.

²³ ‘Abo‘agu ni‘atu ia sawara ‘atua iauiaukwa ‘ena ‘i dududura: ‘Abo‘agu si ‘ulatu‘eiegu ta ia mwa‘uta bilolo ‘atua.

²⁴ ‘Aegu tubwedi si neneta edidigurega; Ta esiogu iapana ‘i gumwara.

²⁵ ‘Abo‘agu wate ‘ebesinara ‘edia: ‘Ena si ‘itegu, si lonepanepa.

²⁶ Ieoba ie ‘igu Eaubada, ‘u da lemegu; ‘U da ‘etoseegu ‘imu nua‘ole‘ole na‘ieana:

²⁷ Be ‘enega si da mwaratoni ‘aene gete nimaio; Ta ‘oio, Ieoba, ‘u guinuena.

²⁸ Si da elia, ta ‘oio ‘u da onaoboboma: ‘Ena si tooro, si da omaiamaia, ta ‘imu to guinua ‘i da guausoara.

²⁹ ‘Agu tarauwarao si da e‘oama ‘ebesinarega, Ta si da ‘apwaridi taudi ‘idi ‘omaiamaia ‘enega ‘atua tara‘apwarega.

³⁰ Ia da lokagutoki sinabwana Ieoba ‘ena ‘awaguiega. Tamo, ia da tupuna boda gamwagamwanaia.

³¹ Gomabeso ‘atainaia ‘i da tooro ta ‘enega, Be ‘enega taudi iaruiaruana si loinena ‘ediega ‘i da ‘etoseena.