Salamo 108 - Buki Tabu Lowaenei 1919

SALAMO 108.

¹ Eaubada ie, ‘ategu ‘i mia‘i‘ita; ia da wari, tamo, ia da wari tuputupu, tuga ma‘igu ‘ebetuputupu.

² Wa da tooro, Nosanosa ta api: ‘Abo‘agu ia da tooro manini gonagonaia.

³ Ieoba ie, ‘emuia ia da lokagutoki, tomota gamwagamwanidia: Ta ia da wari tuputupu ‘emuia ‘ebeloinao gamwagamwanidia.

⁴ ‘Imu nua‘ole‘ole ‘i sinabwana garewao ‘etanidia, Ta ‘imu ona‘ai‘aila ‘i tu‘e garewaia.

⁵ Eaubada ie, ‘U da mia tu‘e garewa debanaia: Ta ‘imu esaesa bare‘u maibo‘ana debanaia.

⁶ ‘Ataimuiega ‘u da ‘etoseema, ta ‘u da ona limana ‘emaia, Be ‘enega ‘imu oboobobomao si da li‘amidi.

⁷ Eaubada ni‘atu ‘i onaona ‘ina ‘esasenega; Ia da uiawana: Sekema Ia da weari rua, ta Sukota ‘ana ‘abatau Ia da ‘etopwapwa.

⁸ Gileada ‘igu ‘asa; Manase ‘igu ‘asa; Eparaima wate debagu ‘ana lawa; Iuda ‘igu keweliwelili esaesa.

⁹ Moaba ‘agu gaeba ‘ebe‘utu; Edoma ‘ena ‘agu ‘aeiapaiapa Ia da ‘ulena; Pilisitia manuna Ia da bwau.

¹⁰ Iaita ‘i da ‘au‘eweguma ‘asa ma‘ana ‘ari ‘enaia? Iaita i ‘au‘ewegu Edoma ‘enaia?

¹¹ Eaubada ie, nigea nai u ‘ulaiaulema? Ta Eaubada ie, nigea ‘u apwesa ma‘ama bodao.

¹² Leme ‘u da ‘ebwaema tarauwara matanaia: Tai ‘ana leme iage besobeso ta ‘enega.

¹³ Eaubada ‘enega ta da guinua waiwai: Tauna ‘adi tarauwarao ‘i da aiaidi.