Salamo 107 - Buki Tabu Lowaenei 1919SALAMO 107. 1 Ieoba ‘ena wa da lokagutoki; tauna ‘i bobo‘ana ta ‘enega: ‘Ina nua‘ole‘ole ‘i mia ‘ataia ta ‘enega. 2 Ieoba ‘ina li‘ali‘amidi si da ona nadigega, Taudi ni‘atu ‘i li‘amidi tarauwara nimanega; 3 Ta ‘i egogonedi ‘asa ‘ediega, Bomatuiega ta ‘ebwagega, Iaaratega ta iarasiega. 4 Mitawaia si lopilidadana ‘eda waborebore ‘enaia; Nigea ‘e bweu ‘ebemia ‘ana ‘asa si lobaloba. 5 Botana ta tonaadi ‘i iapasa, Iaruiaruadi si mwawamwawasa ‘edia. 6 Ga si bwau ‘idi loniu ‘ena Ieoba ‘enaia, Ta ‘idi ‘elo‘uia ‘ediega i ‘etoseedi. 7 Wate ‘i nuganedi ‘eda paruparunega, Be ‘enega si da tauia ‘ebemia ‘ana ‘asa ‘enaia. 8 ‘Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia! 9 Iaruiarua gewagewana ‘i loema‘ena ta ‘enega, Ta iaruiarua botana ‘i loema‘ena bobo‘anega. 10 Taudi nadigega guguioi ‘ena ta mwawasa ‘ena si miatoa, Ioniionidi elo‘uia ta kainumu ‘ediega; 11 Ieoba ‘ina ona ‘edia si loguitoasena ta ‘enega, Ta To‐lo‘etana Sana ‘ina nuena si sinarina: 12 ‘Enega ‘atedi ‘i gimwa‘utena guinuega; Si be‘u, ta nigea ‘e bweu ‘ebeleme. 13 Ga si bwau ‘idi loniu ‘ena Ieoba ‘enaia, Ta ‘idi ‘elo‘uiaiao ‘ediega i ‘etoseedi. 14 Guguioi ta mwawasa ‘ina iauiaukwa ‘ediega ‘i me‘edi, Ta ‘idi ‘ebeiona ‘i wearidi. 15 ‘Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia! 16 ‘Auboda barasa ni‘atu ‘i wearina ta ‘enega, Ta sa‘ubarabara kainumu i ‘upwa ruedi. 17 To euwauwa ‘idi li‘oa‐loina manuna, Ta ‘idi bubuna bokobokodi manuna, si elo‘uia. 18 Iaruiaruadi ‘e‘ai ‘ana bubuna iauiauna ‘i guitoasena; Ta mwawasa ‘ina ‘aubodao deidia si doro. 19 Ga si bwau ‘idi loniu ‘ena Ieoba ‘enaia, Ta ‘idi elo‘uiaiao ‘ediega i ‘etoseedi. 20 ‘Ina ona ‘i etunena, ta ‘i gibo bo‘anedi, Ta ‘adi gaula saoora ‘ediega ‘i etoseedi. 21 Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia! 22 Ta lokagutoki ‘ana tariao si da ‘ebwaea, Ta ‘ina guinuao si da simanedi wariega. 23 Taudi si mwa‘uta oraia waga ‘edia, Taudi si guiguinua boasi sinabwadi ‘edia; 24 Getedi Ieoba ‘ina guinuao si ‘itedi, Ta ‘ina iage ‘ebenua‘owanao ni‘uia. 25 ‘I ona ta ‘enega, ta iagila sinabwana ‘i gietoorona, Tauna ‘ina lisuiao ‘i gitu‘eiedi. 26 Si tu‘e garewaia, si mwa ‘uta limana ni‘uia; Iaruiaruadi ‘i doga iaulei loniu manuna. 27 Si loniu dadana, ta si gado gado ‘atua tai ‘i numa bolausa, Ta ‘idi sinasinapu ‘i gumwara ‘ai‘aila. 28 Ga si bwau ‘idi loniu ‘ena Ieoba ‘enaia, Ta ‘idi elo‘uiaiao ‘ediega ‘i me‘edi. 29 Iagila sinabwana ‘i giesiwaroina, Ta enega ‘ina lisuiao si mia ‘emwaule. 30 Ga si guausoara ‘idi mia enono manuna; Ga nadigega ‘i me‘edi gomwagomwa si nuanuana ‘enaia. 31 ‘Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia! 32 Tomota ‘idi deriegogona wate ‘ena si da gitu‘eiena, Ta ‘inapwanao ‘idi ‘ebemiatoa ‘ena si da tupuna. 33 Boasi‘awanao ‘i gibunidi be si ‘emitawa, Ta wewerupwa be si ‘ebwa‘a iapasa; 34 ‘Asa ualoebwaina be ‘i ekaukau maorana, Taudi ‘ana tomianao ‘idi to‘umalina manuna. 35 Mitawadaisinamo ‘i gibunina be ‘i e boasigaula, Ta bwa‘a iadaiadana be ‘i ewewerupwaiao. 36 Ta botanidi ‘i loinedi be ‘ena si miami, Be ‘enega ‘ebemia ‘ana ‘asa si da sa‘u ‘ai‘ailina; 37 Ta bagurao si da daunidi, ta oine si da asodi, Ta sinabwa ‘ana uanao si da ‘ewedi ‘edia. 38 I ‘awaobobomedi wate, ta ‘enega si eiau sinabwana; Ta ‘idi bulomakau nigea ‘i tagwara be si mwa‘uta. 39 Wate, Si mwa‘umwa‘uta ta si kopukopu Didigega ta, loniuiega ta, dedoi ‘enega ta. 40 ‘Inapwanao sinasinara ‘edia ‘i siwa, Ta ‘i loinedi be waborebore ‘ena si tautauia, ‘ena nigea ‘edanamo. 41 Ta gomabesodi ‘i sa‘u tu‘eiedi elo‘uia ‘enega, Ta susu ‘i bubudi ‘enaia ‘atua iau. 42 To paruparu si da ‘itena, ta si da guausoara; Ta bubuna bokoboko iauiauna ‘awana ‘i da bodena. 43 Tauna ‘i sinasinapu iage getedi ‘i da ‘ita‘i‘isi, Ta Ieoba ‘ina nua‘ole‘oleao si da nuedi. |
Published by the British and Foreign Bible Society in 1919
British & Foreign Bible Society