Salamo 107 - Buki Tabu Lowaenei 1919

SALAMO 107.

¹ Ieoba ‘ena wa da lokagutoki; tauna ‘i bobo‘ana ta ‘enega: ‘Ina nua‘ole‘ole ‘i mia ‘ataia ta ‘enega.

² Ieoba ‘ina li‘ali‘amidi si da ona nadigega, Taudi ni‘atu ‘i li‘amidi tarauwara nimanega;

³ Ta ‘i egogonedi ‘asa ‘ediega, Bomatuiega ta ‘ebwagega, Iaaratega ta iarasiega.

⁴ Mitawaia si lopilidadana ‘eda waborebore ‘enaia; Nigea ‘e bweu ‘ebemia ‘ana ‘asa si lobaloba.

⁵ Botana ta tonaadi ‘i iapasa, Iaruiaruadi si mwawamwawasa ‘edia.

⁶ Ga si bwau ‘idi loniu ‘ena Ieoba ‘enaia, Ta ‘idi ‘elo‘uia ‘ediega i ‘etoseedi.

⁷ Wate ‘i nuganedi ‘eda paruparunega, Be ‘enega si da tauia ‘ebemia ‘ana ‘asa ‘enaia.

⁸ ‘Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia!

⁹ Iaruiarua gewagewana ‘i loema‘ena ta ‘enega, Ta iaruiarua botana ‘i loema‘ena bobo‘anega.

¹⁰ Taudi nadigega guguioi ‘ena ta mwawasa ‘ena si miatoa, Ioniionidi elo‘uia ta kainumu ‘ediega;

¹¹ Ieoba ‘ina ona ‘edia si loguitoasena ta ‘enega, Ta To‐lo‘etana Sana ‘ina nuena si sinarina:

¹² ‘Enega ‘atedi ‘i gimwa‘utena guinuega; Si be‘u, ta nigea ‘e bweu ‘ebeleme.

¹³ Ga si bwau ‘idi loniu ‘ena Ieoba ‘enaia, Ta ‘idi ‘elo‘uiaiao ‘ediega i ‘etoseedi.

¹⁴ Guguioi ta mwawasa ‘ina iauiaukwa ‘ediega ‘i me‘edi, Ta ‘idi ‘ebeiona ‘i wearidi.

¹⁵ ‘Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia!

¹⁶ ‘Auboda barasa ni‘atu ‘i wearina ta ‘enega, Ta sa‘ubarabara kainumu i ‘upwa ruedi.

¹⁷ To euwauwa ‘idi li‘oa‐loina manuna, Ta ‘idi bubuna bokobokodi manuna, si elo‘uia.

¹⁸ Iaruiaruadi ‘e‘ai ‘ana bubuna iauiauna ‘i guitoasena; Ta mwawasa ‘ina ‘aubodao deidia si doro.

¹⁹ Ga si bwau ‘idi loniu ‘ena Ieoba ‘enaia, Ta ‘idi elo‘uiaiao ‘ediega i ‘etoseedi.

²⁰ ‘Ina ona ‘i etunena, ta ‘i gibo bo‘anedi, Ta ‘adi gaula saoora ‘ediega ‘i etoseedi.

²¹ Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia!

²² Ta lokagutoki ‘ana tariao si da ‘ebwaea, Ta ‘ina guinuao si da simanedi wariega.

²³ Taudi si mwa‘uta oraia waga ‘edia, Taudi si guiguinua boasi sinabwadi ‘edia;

²⁴ Getedi Ieoba ‘ina guinuao si ‘itedi, Ta ‘ina iage ‘ebenua‘owanao ni‘uia.

²⁵ ‘I ona ta ‘enega, ta iagila sinabwana ‘i gietoorona, Tauna ‘ina lisuiao ‘i gitu‘eiedi.

²⁶ Si tu‘e garewaia, si mwa ‘uta limana ni‘uia; Iaruiaruadi ‘i doga iaulei loniu manuna.

²⁷ Si loniu dadana, ta si gado gado ‘atua tai ‘i numa bolausa, Ta ‘idi sinasinapu ‘i gumwara ‘ai‘aila.

²⁸ Ga si bwau ‘idi loniu ‘ena Ieoba ‘enaia, Ta ‘idi elo‘uiaiao ‘ediega ‘i me‘edi.

²⁹ Iagila sinabwana ‘i giesiwaroina, Ta enega ‘ina lisuiao si mia ‘emwaule.

³⁰ Ga si guausoara ‘idi mia enono manuna; Ga nadigega ‘i me‘edi gomwagomwa si nuanuana ‘enaia.

³¹ ‘Eguma tai Ieoba si da tupuna ‘ina bubuna bobo‘ana manuna, Ta ‘ina guinua to sinabwa sadi manuna tai natudiao ‘edia!

³² Tomota ‘idi deriegogona wate ‘ena si da gitu‘eiena, Ta ‘inapwanao ‘idi ‘ebemiatoa ‘ena si da tupuna.

³³ Boasi‘awanao ‘i gibunidi be si ‘emitawa, Ta wewerupwa be si ‘ebwa‘a iapasa;

³⁴ ‘Asa ualoebwaina be ‘i ekaukau maorana, Taudi ‘ana tomianao ‘idi to‘umalina manuna.

³⁵ Mitawadaisinamo ‘i gibunina be ‘i e boasigaula, Ta bwa‘a iadaiadana be ‘i ewewerupwaiao.

³⁶ Ta botanidi ‘i loinedi be ‘ena si miami, Be ‘enega ‘ebemia ‘ana ‘asa si da sa‘u ‘ai‘ailina;

³⁷ Ta bagurao si da daunidi, ta oine si da asodi, Ta sinabwa ‘ana uanao si da ‘ewedi ‘edia.

³⁸ I ‘awaobobomedi wate, ta ‘enega si eiau sinabwana; Ta ‘idi bulomakau nigea ‘i tagwara be si mwa‘uta.

³⁹ Wate, Si mwa‘umwa‘uta ta si kopukopu Didigega ta, loniuiega ta, dedoi ‘enega ta.

⁴⁰ ‘Inapwanao sinasinara ‘edia ‘i siwa, Ta ‘i loinedi be waborebore ‘ena si tautauia, ‘ena nigea ‘edanamo.

⁴¹ Ta gomabesodi ‘i sa‘u tu‘eiedi elo‘uia ‘enega, Ta susu ‘i bubudi ‘enaia ‘atua iau.

⁴² To paruparu si da ‘itena, ta si da guausoara; Ta bubuna bokoboko iauiauna ‘awana ‘i da bodena.

⁴³ Tauna ‘i sinasinapu iage getedi ‘i da ‘ita‘i‘isi, Ta Ieoba ‘ina nua‘ole‘oleao si da nuedi.