Salamo 106 - Buki Tabu Lowaenei 1919

SALAMO 106.

¹ Ieoba wa da tupuna. Ieoba ‘ena wa da lokagutoki; tauna ‘i bobo‘ana ta ‘enega: ‘Ina nua‘ole‘ole ‘i mia‘ataia ta ‘enega.

² Iaita nai Ieoba ‘ina guinua waiwai ‘i da ‘inanedi, Nai ‘ana tuputupu iauiauna ‘i da e‘ita?

³ Taudi loina si ‘ita‘i‘isi si mia bobo‘ana, Ta tauna bubuna paruparu ‘i guinua tuta iauiauna.

⁴ Ieoba ie, ‘u da nua‘i‘isigu nua‘ole‘ole nina ‘imu tomota ‘edia ‘u e‘ita ‘enega; ‘U da mai ‘eguia ma‘imu ‘etoseana:

⁵ Be ‘enega ‘imu ‘esi‘esinuadi ‘idi mia bobo‘ana ia da ‘itena, Be ‘enega ia da guausoara ‘imu ‘asa ‘ina uiawanega, Be ‘enega ia da tuputupu ‘imu ‘egu‘eguiai ‘enega.

⁶ Ni‘atu ‘a loegesi tubumao ma‘edi, Ni‘atu ‘a bubuna bokoboko, ni‘atu ‘a guinua to‘umali.

⁷ Tubumao ‘imu guinua sinabwadi Aigupito ‘ena nigea si mwaratoni; ‘Imu nua‘ole‘oleao ‘adi iau nigea si nua‘i‘isi; Ta si loguitoasa oraia, tuga Ora Bweabwearina ‘enaia.

⁸ Ta ‘ana esana manuna i ‘etoseedi, Be ‘enega ‘ina waiwai to sinabwa sana ‘i da gieapwesena.

⁹ Ora Bweabwearina wate ‘i ba‘ena, ta ‘i loiadaiada: Nadigega ni‘uiega i ‘au‘ewedi, ‘atua mitawega.

¹⁰ Ta tauna nuana ‘i to‘umali ‘edia nimanega i ‘etoseedi, Ta tarauwara nimanega i ‘ewa limedi.

¹¹ Ta boasiao ‘adi tarauwarao si bodedi: Nigea ‘e bweu ‘ediega ‘i tupwatupwa.

¹² Ga ‘ina ona si iaredi; ‘Ana tuputupu si wariena.

¹³ ‘Ina guinuao si nuapupura manini; ‘Ina nuena nigea si iamwaiamwa manuna:

¹⁴ Ta si iaraiarakwaia sinabwana mitawaia, Ta Eaubada si toona esena waborebore ‘enaia.

¹⁵ Ta ‘idi sidasida i ‘ebwaedi; Ta wakaka ‘i etunena iaruiaruadi ‘enaia.

¹⁶ Wate Mose manuna si e‘ipi‘ipi ‘asa ‘etoiobulu ‘enaia, Ta Aarona Ieoba ‘ina to ‘esasena.

¹⁷ Bare‘u ‘i egegena ta Datana ‘i tonena, Ta Abirama ‘ina boda ‘i bodedi.

¹⁸ Ta awe si loe‘abina ‘idi boda ‘enaia; Awe sabelulu to to‘umalidi i ‘arataiauledi.

¹⁹ Bulomakau menonoiana si bubuna Oreba ‘enaia, Ta tokwarui dogadogana ‘ena si bwagobwago.

²⁰ Nadigega ‘idi esaesa si gibunina Bulomakau to ‘e‘ai nedu ‘ana ma‘ama‘aiau manuna.

²¹ Eaubada ‘idi To ‘Etoseana si nuapupurena, Tauna iage sinabwadi ‘i guinuedi Aigupito ‘enaia;

²² Guinua ‘ebenua‘owanao ‘asa Ama ‘enaia, Ta iage didigao Ora Bweabwearina deinaia.

²³ Ta ‘enega ‘i ona ‘aene ‘i da giesaooridi, ‘Abo Mose ‘ina ‘esi‘esinua nigea ‘i tooro mwatu‘iia matanaia, Be ‘ina gamwasoara ‘i gibunina, ‘abona nai ‘i da giesaooridi.

²⁴ Tamo, ‘asa ‘ana ‘ita bobo‘ana si sinarina, ‘Ina ona nigea si iaredi;

²⁵ Ta si ona olilisana ‘idi anuaia, Ta Ieoba ‘enana nigea si nonona.

²⁶ Ta ‘enega nimana ‘i gilagasi ‘edia, ‘Aene ‘i da giebe‘uiedi mitawaia:

²⁷ Ta ‘aene tubudiao ‘i da ‘ulamwa‘utedi ‘ebeloinao gamwagamwanidia, Ta ‘i da lelewanedi ‘asao ‘edia.

²⁸ Wate Baala‐Peora ‘ena si tubwedi, Ta to mwawasa ‘adi tariao si ‘e‘ai.

²⁹ Ga si eiabena be ‘i da gamwasoara ‘idi bubuna ‘enega; Ta muia ‘i wearina ‘edia.

³⁰ Ga Pineasa ‘i tooro, ta ‘i giloina: Ta nadigega muia ‘i losa‘u.

³¹ Ta gote ‘ena si sawa ‘aene bubuna paruparu, Ga ‘epata tomota iauiauna ‘edia ta gea‘abo ‘i gumwagumwara.

³² ‘Ana gamwasoara si sa‘una wate boasi Meriba ‘edia, Ta ‘enega Mose to‘umalina ‘i lobena manudi:

³³ Iaruiaruana ‘ena si loguitoasa ta ‘enega, Ta ‘i ona geiogeioi sopanega.

³⁴ Tomota nigea si giesaooridi, Na‘ieana Ieoba ‘i loina ‘edia:

³⁵ Ta ‘ebeloinao ma‘ediao si egosigosiana, Ta ‘idi guinuao si sinapudi:

³⁶ Ta ‘idi tokwaruiao ‘edia si guinua; Iage gete ‘i esikwa ‘edia:

³⁷ Tamo, natudiao me ‘olotodi ta me wainedi si gitaria dimoniao ‘edia,

³⁸ Ta rara nigea to‘umalinamo si giedau, tuga natudiao me ‘olotodi ta natudiao me wainedi raradi, Taudi si taria Kanania ‘ina tokwaruiao ‘edia; Ta ‘asa ‘i baila rarega.

³⁹ Nadigega si baila ‘idi guinuao ‘ediega, Ta si sogasogara ‘idi bubunega.

⁴⁰ Ta ‘enega Ieoba ‘ina gamwasoara i ‘ara‘arata ‘ina tomota ‘edia, Ta ‘ana ‘egu‘eguia ‘i guitoasena.

⁴¹ Ta ‘i tagwaredi ‘ebeloinao nimadi ‘edia; Ta taudi nuadi ‘i to‘umalina ‘edia si loinedi.

⁴² ‘Adi tarauwarao wate iage mwau si sa‘una ‘edia, Ta nimadi ‘agarauna si sa‘udi be ‘edia si ematamatana.

⁴³ Tuta iauna i ‘eto‘etoseedi; Ta ‘idi nuanua ‘enega si loguitoasa, Ta si mwa‘uta ‘idi bubuna bokoboko ‘enega.

⁴⁴ Ta ‘idi elo‘uia i ‘itena, ‘Ena ‘idi dedo ‘i nonona:

⁴⁵ Ta manudi ‘ina ona‘upa‘upa ‘i nua‘i‘isina, Ta nuana ‘i ebunina na‘ieana ‘ina nua‘ole‘oleao ‘adi iau.

⁴⁶ Wate ‘adi nua‘ole‘ole ‘i sa‘u Iauiaudi si ionidi ‘edia.

⁴⁷ Ieoba ‘ima Eaubada, ‘u da ‘etoseema, Ta ‘ebeloinao gamwagamwanidiega ‘u da egogonema, Be ‘a da lokagutoki ‘amu esana tabu ‘enaia, Be ‘a da ona waiwai ‘amu tuputupu enega.

⁴⁸ Ieoba ta da tupuna, Iseraela ‘ina Eaubada, Tuta nigea ‘i nugana ga tuta gea‘abo ‘i gumwagumwara. Ta tomota iauiauna si da gwae, Emeni. Ieoba wa da tupuna.