Salamo 105 - Buki Tabu Lowaenei 1919

SALAMO 105.

¹ Ieoba ‘ena wa da lokagutoki, ‘ana esana ‘ena wa da bwau; ‘Ina guinuao wa da e‘ita tomota gamwagamwanidia.

² ‘Ena wa da wari, ‘ena wa da wari tuputupu; ‘Ina guinua to sinabwasadi iauiaudi wa da onaona manudi.

³ ‘Ana esana tabu ‘enega wa da ‘awaesaesa: Taudi Ieoba si ‘ebesa ‘atedi si da guausoara.

⁴ Ieoba ta ‘ina waiwai wa da ‘ebesa; Maninina wa da ‘ebesa ‘ataia.

⁵ ‘Ina guinua to sinabwasadi taudi ni‘atu ‘i guinuei wa da nua‘i‘isidi; ‘Ina ‘ebenua‘owanao, ta ‘awana ‘ina loinao;

⁶ ‘Omi Aberaamo ‘ina to guinua tubunao, ‘Omi Iakobo natunao, ‘esi‘esinuami.

⁷ Tauna Ieoba ‘ida Eaubada: ‘Ina loinao gabura maibo‘ana ‘ena si miami.

⁸ ‘Ina ona‘upa‘upa ‘i nua‘i‘isi ‘ataena, Ona tauna ‘i oneonena epata tomota tausana ‘edia;

⁹ Ona ‘upa‘upa nina ‘i bubuna Aberaamo ma‘ieana, Ta ‘ina ona‘upa‘upa Isaako ‘enaia;

¹⁰ Ta tauna iage nina ‘i giepa‘arina loina manuna Iakobo ‘ena, Iseraela ‘ena ona‘upa‘upa ‘ataia manuna:

¹¹ ‘I gwae, ‘Emuia ‘asa Kanania ia da ‘ebwaea, ‘Amu ‘egu‘eguia ‘ana raba:

¹² ‘Ena taudi tai pu‘epu‘edi ‘adi sawa; Tamo, to pu‘epu‘edi sana, ta ‘ena si sugalagala;

¹³ Ta si tautauia dadana ‘ebeloinega ta ‘ebeloina ‘ena, ‘Asa ‘e bweuna ‘enega ta mari tomota ‘edia.

¹⁴ Nigea ‘e bweu tai ‘i tagwarena be ‘i gieto‘umaliedi; Tamo, kiniao ‘i ba‘edi manudi;

¹⁵ ‘I gwae, ‘Igu ‘oro‘oroidi gea‘abo wa da gitoodi, Ta ‘igu paropitao gea‘abo wa gieto‘umaliedi.

¹⁶ Ta botana ‘i bwauiena ‘asa ‘enaia; Masura ‘ana ‘ewa‘ewa maibo‘ana ‘i lasena.

¹⁷ Tai ‘i etunena matadia: Iosepa si gimwaniena be ‘i e toguinua:

¹⁸ ‘Aena si gie‘elo‘uiena ‘ebeionega; ‘Aupa kainumu ‘ena si e‘enoina:

¹⁹ Ga tuta nina ‘ina ona ‘i apwesa; Ieoba ‘ina ona ‘i toona.

²⁰ ‘Inapwana ‘i etunena ta ‘i li‘amina; Tuga tomota ‘idi to loina, ta ‘i tagwarena be ‘i tauia.

²¹ ‘I aseiena be tauna ‘ina anua ‘ana ‘inapwana, Ta ‘ina gwegwe iauiauna ‘ana to loina:

²² Be ‘ina ‘inapwanao ‘i da ionidi tauna ‘ina loinega, Ta ‘ina to deriegogonao sinasinapu ‘i da e‘itedi.

²³ Iseraela wate ‘i mai Aigupito ‘enaia; Ta Iakobo ‘asa Ama ‘ena ‘i mia kabo.

²⁴ Ta ‘ina tomota ‘i gieiauwawasaedi, Ta ‘i giewaiwaiwawasaedi ‘adi tarauwarao ‘edia.

²⁵ ‘Atedi ‘i gibunina be ‘ina tomota si da guitoasedi, Be si wasegigi ‘ina to guinuao ‘edia.

²⁶ ‘Ina to guinua Mose ‘i etunena, Ta Aarona tauna i ‘esinuena.

²⁷ ‘Ina we‘iwe‘iiaiaiao si sa‘u ‘edia, Ta iageao ‘ebenua‘owana ‘asa Ama ‘enaia.

²⁸ Guguioi ‘i etunena, ta ‘i gieguguioinina; Ta ‘ina ona nigea si loguitoasedi.

²⁹ ‘Adi boasiao ‘i gibunidi be si erara, Ta ‘idi iana ‘i loemwawasidi.

³⁰ ‘Idi ‘asa ‘i maa kwekwe ‘ediega, ‘Idi ‘inapwanao ‘idi anua ‘ebe‘enoiao.

³¹ ‘I ona, ga nenewara ma‘adi iau si mai, Ta ‘utu ‘idi raba iauiauna ‘edia.

³² ‘Usana‐gurewa i ‘ebwaedi ‘usana manuna, Ta awe sabelulu ‘idi ‘asa ‘enaia.

³³ ‘Oine wate be dimomo ‘i unudi; Ta ‘idi rabao ‘adi kaiwe ‘i lasedi.

³⁴ ‘I ona, ga bilolo ‘i mai, Ta didimwana, ta gea‘abo ta sawedi.

³⁵ Ta pwatura iauiauna ‘idi ‘asaia si ‘eegumwaridi, Ta ‘idi bwa‘a uana si ‘eegumwaridi.

³⁶ Tomatua iauiaudi ‘idi ‘asaia ‘i unudi, ‘Idi waiwai ‘ana to sinabwao.

³⁷ I ‘au‘ewedima silebega ta golega: Ta nigea ‘e bweu to neneta ‘ina susu ‘edia.

³⁸ Aigupito ‘i guausoara tuta ‘enega si tauiawa; Matautedi ‘i be‘u ‘edia ta ‘enega.

³⁹ Poana ‘i kabokabo bodaboda manuna; Ta awesabelulu be ‘i giema‘edana boiboi.

⁴⁰ Si sida, ga legigia ‘i me‘edi, Ta ‘i loema‘edi garewa masurinega.

⁴¹ Gurewa ‘i gigegena, ta boasi si dau toitoilama; Si pili esena iadaiadadi ‘edia boasi‘awa ‘atua.

⁴² ‘Ina ona tabu ‘i nua‘i‘isina ta ‘enega, Ta Aberaamo ‘ina to guinua.

⁴³ ‘Ina tomota i ‘au‘ewedima guausoarega, Ta ‘ina esiesinuadi wariega.

⁴⁴ ‘Ebeloina ‘idi ‘asao i ‘ebwaedi; Ta tomota ‘idi guinua si ‘ewena ‘idi iage:

⁴⁵ Be ‘enega ‘ina loina tomwanao si da ‘ita‘i‘isidi, Ta ‘ina loinao si da guinuedi. Ieoba wa da tupuna.