Salamo 104 - Buki Tabu Lowaenei 1919

SALAMO 104.

¹ Iauiaruagu ie, Ieoba ‘u da tupuna. Ieoba ie ‘igu Eaubada, ‘oio to sinabwa saio; ‘Amu ‘oama ‘amaiaba ta esaesa.

² Tauio ‘u bodemu ma‘edanega ‘atua ‘oamega; Tauio garewao ‘u lisidi ‘atua ‘aubodakaleko:

³ Tauio ‘imu anua‐‘ebemianao ‘adi kaiwe sa‘u barabara ‘u sa‘udi boasi ‘edia; Tauio poanao ‘u bubudi ‘imu wagalisilisiao; Tauio iagila papenao ‘edia ‘u tautauia:

⁴ Tauio iagilao ‘u bubudi ‘imu ‘etu‘etuneao; ‘Imu ‘etu‘etuneao awe sabelulu:

⁵ Tauio gabura ‘ana ‘autui ‘u sa‘una, Be ‘enega gea‘abo ‘i da loniu ga tuta iauiauna.

⁶ ‘U bodena ni‘uiega ‘atua tara‘apwarega; Boasiao si tooro ‘oeao debadia.

⁷ ‘Imu ba‘e ‘enega si dena; ‘Imu weparara ‘enanega si pili manimaniniwa;

⁸ Si tu‘e ‘oega, si mwa‘uta sa‘arega, Esena nina ‘ena tauna ‘ana ‘autu ‘u sa‘u manudi.

⁹ Raba ni‘atu u sa‘una tauna gea‘abo si da ‘ataona; Be ‘enega gea‘abo si da ‘ila limanama be bare‘u si da bodena.

¹⁰ Wewerupwao ‘i etunedi sa‘ara ‘edia; ‘Oea gamwagamwanidia si pilipili:

¹¹ Mitawa iobaina iauna si ‘enumedi: Ase mitawa tonaadi si gienuedi.

¹² Deidia garewa manuina si ‘abi ‘asa, Si gwanegwane kaiwe naridi ‘edia.

¹³ ‘Oea boasidi ‘i sa‘udi ‘ina anuao ‘ediega: Bare‘u nuana ‘i bobo‘ana ‘imu guinuao uadiega.

¹⁴ Nedu ‘i gietabwena iobai manudi, Ta pai tai ‘ina guinua manuna; Be ‘enega masura ‘i da ‘ewena bare‘uiega:

¹⁵ Ta oine tauna tai ‘atena ‘i gieguausoarina, Ta bunama be maninina ‘i da lo‘ega‘egaga, Ta masura tauna tai ‘atena ‘i giepa‘ari.

¹⁶ Ieoba ‘ina kaiweao nuadi ‘i bobo‘ana; Lebanona ‘ina maruanidi, taudi ‘i asodi;

¹⁷ ‘Ena manua si ‘abi newa: Ta boe manuna, ‘ina liia keigwana.

¹⁸ ‘Oea kesoradi gota bomitawa manudi; Gurewa ‘ebedena kerei manudi.

¹⁹ Nawarae ‘i aseiena tuta manudi: Sinara tauna ‘ina sugua ‘i mwaramwaratoni.

²⁰ Guguioi ‘u bubuna, ta ‘i boiboi; ‘Ena mitawa iobaina iauiaudi si kawakawarama.

²¹ Laione menonoiadi ‘adi manuna si bwau toitoila, Ta ‘adi masura si ‘eebesa Eaubada ‘enega.

²² Sinara ‘i tooro, si tauiawa, Ta ‘idi gaula ‘edia si ‘eno‘eno.

²³ Tai ‘i apwesa ‘ina guinua ‘enaia Ta ‘ina paisewa ‘ena ga asuinuanua.

²⁴ Ieoba ie, ‘imu guinuao si iauwawasae! Sinasinapuiega ni‘atu ‘u mweruruidi iauiaudi: Bare‘u ‘i maa ‘imu oesiega.

²⁵ Gote ora ‘i miami, sinabwana ta bababana, ‘Ena iage si kawakawara nigea ta sawa kapekapeana, Mwarata gidaridi ta sinabwadi ruarua.

²⁶ ‘Ena waga si tautauia; ‘Ena rabarabaoo, tauna ‘u mweruruina be ‘ena ‘i da losuia‘ena.

²⁷ Getedi iauiaudi manuio si iamwaiamwa, Be ‘enega ‘adi masura ‘u da ‘ebwaedi ‘adi tuta ‘enega.

²⁸ Tauna iage nina u ‘ebwaedi si egogona; Nimaio ‘u tuneiasina, nuadi ‘i bobo‘ana iage bobo‘ana ‘enega.

²⁹ Maniniio ‘u e‘etokwaiena, Si loniu; Iawasidi u ‘ewena, si mwawasa, Ta kau ‘ena si ‘ila.

³⁰ Iaruiaruaio ‘u etunena, si apwesa mwerumweruruidi; Ta ‘oio bare‘u matana ‘u giebobo‘ana limena.

³¹ Ieoba ‘ina esaesa ‘i da mia‘ataia; Ieoba ‘i da guausoara ‘ina guinuao ‘edia:

³² Tauna bare‘u ‘i duneduneiena ta ‘i dededera; ‘Oea ‘i gitoodi, ta si e‘asu.

³³ Ieoba ‘ena ia da wari tuta maibo‘ana ia miami: Ia da wari tuputupu ‘igu Eaubada ‘enaia ‘ena maiawasigu.

³⁴ ‘Igu nuanua ‘i da dibidibi ‘enaia: Ia da guausoara Ieoba ‘enaia.

³⁵ To loegesiao si da gumwara bare‘uiega, Ta to to‘umalidi gea‘abo si da miami. Iaruiaruagu ie, Ieoba ‘u da tupuna. Ieoba wa da tupuna.