Salamo 103 - Buki Tabu Lowaenei 1919

SALAMO 103.

¹ Iaruiaruagu ie, Ieoba ‘u da tupuna; Ta iage iauiauna gamwagamwaniguia, ‘ana esana tabu ‘u da tupuna.

² Iaruiaruagu ie, Ieoba ‘u da tupuna, Ta ‘ina guinua bobo‘adi iauiauna gea‘abo ‘u nuapupuredi:

³ Tauna ‘imu bubuna bokobokodi iauiauna nigea ‘i e‘isa; Tauna ‘imu le‘oasa iauiauna ‘i giebobo‘anedi;

⁴ Tauna iawasiio i ‘ewalimena saoorega: Tauna oboboma nua‘ole‘ole ta nua‘ole‘ole nuana debamuia ‘i sa‘u ‘amu peaula:

⁵ Tauna ‘awaio ‘i loema‘ena iage bobo‘adi ‘ediega; Ta ‘enega ‘amu tuta tubuau ‘i apwesa limana magisubu ‘atua.

⁶ Ieoba guinua paruparudi ‘i bubudi, Ta loinao taudi iauiaudi si mia mwa‘uta manudi.

⁷ ‘Ina ‘edao ‘i e‘ita Mose ‘enaia, ‘Ina guinuao Iseraela tubunao ‘edia.

⁸ Ieoba ‘i maa nua‘ole‘oleiega ta nuana ‘i bobo‘ana, ‘I so‘iso‘i gamwasoara ‘enaia, ta nua‘ole‘oleiega ‘i sinabwa.

⁹ Gea‘abo ‘i da ba‘e ‘ataia; Wate gea‘abo ‘i gamwasoara ‘ataia.

¹⁰ Nigea ‘i bubu ‘edaia nadigega ‘ida loegesiao, Nai ‘i e‘iseda nadigega ‘ida bubuna bokobokodi.

¹¹ Na‘ieana garewa ‘i lo‘etana sana gabura debanaia, Na‘ieana ‘ina nua‘ole‘ole ‘ana sinabwa taudi si ‘amaiabena ‘edia.

¹² Nadigega bomatu ‘i mia ‘edasora ‘ebwagega, Nadigega ‘ana ‘edasora ‘ida li‘oaloina i ‘ewedi ‘edega.

¹³ Na‘ieana tamadi natunao i ‘atenua‘ole‘oleiedi, Na‘ieana Ieoba taudi si ‘amaiabena i ‘atenua‘ole‘oleiedi.

¹⁴ Bwarada ‘i mwaramwaratonina ta ‘enega; ‘I nua‘i‘isi ‘abo‘ada kau.

¹⁵ Ta tai manuna, ‘ina asiatao nedu ‘atua: Na‘ieana mitawa senina, na‘ieana ‘i sinabwa.

¹⁶ Iagila ‘i taonena, ta ni‘atu ‘i sawara; Ta ‘ina esena gea‘abo wate ‘i da mwaratonina.

¹⁷ Ta Ieoba ‘ina nua‘ole‘ole taudi si ‘amaiabena ‘edia ‘i mia ‘ataia be ‘ataia, Ta ‘ina bubuna paruparu natunao natudiao ‘edia;

¹⁸ Taudi nadigega ‘ina ona‘upa‘upa si ‘ita‘i‘isina, Ta taudi ‘ina loina si nua‘i‘isidi be si guinuedi.

¹⁹ Ieoba ‘ina ‘ebemi esaesa ni‘atu ‘i sa‘u ‘ai‘ailina garewaia; Ta ‘ina ‘ebeloina iage iauiauna ‘i loinedi.

²⁰ Ieoba wa da tupuna, ‘omi ‘ina aneloseao: ‘Omi pa‘ara ‘enega wa ewaiwai, ‘ina ona wa losaroni, ‘Ina ona ‘enana wa nonona.

²¹ Ieoba wa da tupuna, ‘omi iauiaumi ‘ina bodao; ‘Omi ‘ina to‐guinuao, ‘ina nuanua wa guinuena.

²² Ieoba wa da tupuna, ‘omi ‘iauiaumi ‘ina guinuao, ‘Ina ‘ebeloina ‘ana esena iauiauna ‘edia: Iaruiaruagu ie, Ieoba ‘u da tupuna.