Salamo 102 - Buki Tabu Lowaenei 1919

SALAMO 102.

¹ Ieoba ie, ‘igu sidasida ‘u da nono, Ta ‘igu bwau ‘i da wai ‘emuia.

² ‘Igu dedoi ‘ana asiata gea‘abo maniniio ‘u da kwaiena ‘eguiega: Tenaio ‘u da tagwara ‘eguia; Asiata ‘enega ia bwau ‘u da ona limana manini ‘eguia.

³ ‘Igu asiatao si sawara ‘asu ‘atua, Ta luluguao si ‘ara‘arata ‘atua kaiwe ‘ara‘arata.

⁴ ‘Ategu ‘i esilae nedu ‘atua, ta i ‘oaperu; ‘E‘ai ‘agu masura ia nuapupurena ta ‘enega.

⁵ ‘Igu sidasida ‘enana manuna Luluguao esiogu ‘ena si miaiaina.

⁶ ‘Abo‘agu mitawa boena ‘atua; Abo‘agu waborebore ‘ina golu ‘atua.

⁷ Ia ‘ita‘i‘isi, ta ia nadigega Dinewiwiia ‘i mia tebweuna anua debanaia.

⁸ ‘Agu tarauwarao si eliegu asiata maibo‘ana; Taudi si egamwagamwagu ‘eguia si ona besobeso ‘eguiega.

⁹ Karikau ia ‘e‘ai palaua ‘atua, Ta ‘agu boasi ia ‘ili‘ilia dedoiega.

¹⁰ ‘Imu gamwasoara ta ‘imu egamwagamwagu manudi: Ni‘atu u ‘au‘ewegu, ta u ‘ewaiaulegu ta ‘enega.

¹¹ ‘Igu asiatao nadigega iauiaukwa ‘i edudura; Ta ‘abo‘agu ia ‘oaperu nedu ‘atua.

¹² Ta ‘oio, Ieoba ie, ‘u da mia ‘ataia; Ta ‘amu ‘ebenua‘i‘isi ga epata tomota iauiauna ‘edia.

¹³ ‘U da tooro, ta Siona ‘ena ‘u da ‘atenua‘ole‘ole: Ni‘atu ‘ana tuta ‘u da ‘atenua‘ole‘oleiena ta ‘enega, tamo, ‘ana tuta ‘ai‘aila ni‘atu ‘i mai.

¹⁴ ‘Imu to guinuao tauna Siona ‘ina gurewao manudi si guausoara, Ta ‘ina kau ‘ena si nua‘ole‘ole.

¹⁵ Ta nadigega ‘ebeloinao Ieoba ‘ana esana si da matautena, Ta gabura ‘ina kiniao iauiaudi ‘imu esaesa si da matautena;

¹⁶ Ieoba Siona i ‘abi tu‘e ta ‘enega, Ni‘atu ‘i apwesa ‘ina esaesa ‘enaia;

¹⁷ Gomabeso ‘idi sidasida ‘i nuena, Ta ‘idi sidasida nigea ‘i sinarina.

¹⁸ Gete si da ‘etoladina epata tomota ‘i memai manuna: Ta tomota ‘i da mweruruidi Ieoba si da tupuna.

¹⁹ Ina anua tabu ‘ina mia tu‘e ‘enega ni‘atu i ‘ita mwa‘utama ta ‘enega; Garewega Ieoba gabura i ‘itena;

²⁰ Sabi nono ioniionina ‘ina eiawasilagalaga; Sabi li‘amidi mwawasa natunao;

²¹ Be ‘enega tai Ieoba ‘ana esana si da simana Siona ‘ena, Ta ‘ana tuputupu Ierusalema ‘ena;

²² ‘Ena tomota si deriegogona, Ta ‘ebeloinao, sabi guinua Ieoba ‘enaia.

²³ ‘Igu waiwai ‘i gienenetena ‘edega; ‘Igu asiatao ‘i giekukupedi.

²⁴ Ia ona, ‘Igu Eaubada ie, gea‘abo ‘u da tauiegu ‘igu asiatao gamwagamwanidiega: ‘Amu iakwarao epata tomota iauiaudi ‘edia si miami.

²⁵ Lowaeneiega gabura ‘ana ‘autu ‘u sa‘una; Ta garewao nimaio ‘idi guinua.

²⁶ Taudi si da saoora, ta ‘oio ‘u da mia ‘ataia: Tamo, iauiaudi si da kadekaderina ‘oama ‘atua: ‘Atua tara‘apwara ‘u da sa‘ugelasa‘edi, ta si da sa‘ugelasa:

²⁷ Ta ‘oio nadigega tuga, Ta ‘amu iakwarao gea‘abo ‘adi ‘ebelosaroamo.

²⁸ ‘Imu to guinuao natudiao si da miami, Ta tubudiao si da pa‘ara matamuia.