Salamo 101 - Buki Tabu Lowaenei 1919

SALAMO 101.

¹ Ia da wari nua‘ole‘ole ta loina manudi: ‘Emuia, Ieoba ie, ia da wari tuputupu.

² Ia da ‘ita‘i‘isi ‘ai‘ailigu ‘eda bobo‘ai‘ailina ‘enaia: Maisa nai ‘u da mai ‘eguia? ‘Igu anua gamwanaia ia da lopilidadana ‘atebobo‘ai‘ailinega.

³ Gea‘abo ‘e bweu iage besobeso ia da sa‘u mataguia: Taudi si tauia gesi ‘idi guinua ia guitoasena; Gea‘abo ‘i da giiaigu.

⁴ ‘Ate gagasa ‘i da pilisinegu: Gea‘abo ‘e bweu iage to‘umalina ia da mwaratonina.

⁵ Tauna gosiana i ‘awa to‘umali kwaiena, tauna ia da giesaoori: Tauna ma‘ana dunedune tu‘e ta ma‘ate gagasina gea‘abo ia da tagwarena.

⁶ Matagu ‘asa ‘ana to bubu ‘ai‘aila si da ‘itedi, be sida miami ma‘eguao: Tauna ‘eda bobo‘ai‘ailinega ‘i tautauia, tauna ‘i da guinua ‘eguia.

⁷ Tauna ‘i bubu kabokabo gea‘abo ‘igu anua gamwanaia ‘i da miami: Tauna ‘i onaona kabokabo gea‘abo ‘i da mia pa‘ara mataguia.

⁸ Gonagona ta gonagona ‘asa ‘ina to to‘umalinao ia da giesaooridi; Be bubuna bokobokona ‘ana to guinua iauiaudi ia da ‘upwaiauledi Ieoba ‘ina ‘asega.